VP Robredo nagdonar nin 200 quarantine cubicles sa City Hall

August 1, 2020

TENT DUGANG NA QUARATINE FACILITY SA CIUDAD NIN NAGA.   Pigdonar ni VP Leni Robredo sa City Hall asin pig-turn over ni dating Consejal Babeth Lavadia (ika-tolo hale sa wala) sa mga opisyales lokal kan ciudad sa pamamayo ni Alcalde Nelson Legacion (ika-duwa hale sa wala), sa wala si Consejal Salvador del Castillo asin si Consejal Vidal Castillo asin dating Consejal Ray-An Rentoy magkataig sa too.                                                            

Nagdadakul na an mga piglalaog sa quarantine facilities kan lokal na gobierno kan Ciudad nin Naga asin napapanahon an pinadara ni Bise Presidente Leni Robredo na 100 na Indoor modular evacuation, shelter tent o quarantine cubicles alagad igwa pang maabot na 100 nganing gibohon na 200.


Si dating Consejal Babeth Lavadia kan Sangguniang Panlungsod asin ngonian Staff kan Office of the Vice President, pig-turn over na sa City Hall an 100 na quarantine cubicles na pigrecibe ni Alcalde Nelson Legacion asin iba pang miembros kan SP matapos kan flag raising ceremony kan Lunes, Hulyo 27.


Sinabi ni Lavadia an dugang na sangatos (100) ipapadara ni VP Robredo ngonian na semana nganing mahipnuan an kakulangan sa quarantine facility mantang nagdadakul an mga nagpupuling mga Locally Stranded Individuals (LSIs) hale sa Manila alagad nadagdagan pa kan mga empleados kan City Hall na piglalaog sa cuarintina na nagpositivo sa coronavirus disease (Covid 19) sa ginigibong rapid test sa dos mil na empleados kan ciudad.


An size kan quarantine cubicles 2.4 meters x 2.4 meter and 6 feet height. Igwa nang kubong, asin rolled side door cover with net, sabi pa ni Lavadia.


Para sana sa sarong persona mantang maheheling sa retrato an forma kan facilidad.


Kun 200 gabos an idodonar ni Robredo sa City Hall 200 persona man an makikinabang.      

  
An mga quarantine facilities kan City Hall iyo an Elementary asin High School bldg. sa barangay Pacol na sinuble sana sa Department of Education, City Youth Center, asin an ibang porsyon kan JMR Coliseum.  


Bilang pag-andam sa pagkulang-kulang kan quarantine facilities kan City Hall, liwat hahagadon ni Alcalde Nelson sa DepEd na dai muna bawion sa ciudad an duwang public school building sa Brgy. Pacol na ginagamit na cuarintina.


An City College of Naga na ginibo nang Treatment Facility ocupado na kan mga pasyente na nagpositivo sa Covid 19.  (dpa)

Share on Facebook
Share on Twitter
Please reload