CEO nagpatanid sa mga paratambak basura sa drainage canal

An City Engineer’s Office (CEO) kan local na gobierno kan Ciudad nin Naga nagpatanid sa mga residente kan barangay na aabuton nin tubig baha an saindang mga lugar ngonian na panahon nin tig-uran kun dai sinda macooperar na untokon nang magparaapon nin basura sa drainage canal.

An kooperasyon kan lambang comunidad maninigo sana mantang kita gabos apektado kun nagkakaigwa nin tubig baha kun padagos na gigibohon apunan basura an mga drainage canal.

Ini an apelo ni City Engr. Alexander Caning kan City Hall sa publico mantang yaon na sa laog kan mga bulan nig tig-uran dai maiibitaran an insidente nin mga flash flood.

Prueba kaini, kan nakaaging mga semana sa ginibong pagbungkal sa nagkaperang drainage canal tambak naman na mga basura an nahukay kan grupo kan Solid Waste Management Office, City Environment and Natural Resources asin City Engineer’s Ofice.

Nagkapera sana sa mga lugar na tambak an nahukay na mga basura sa barangay Igualdad, Triangulo, Sabang, Tinago asin iba pa.

Ginibo an amay na paglinig nin huli ta padagos naman an mga pag-uran dai maiibitaran an mga flash flood kun barado an mga canal, sabi pa ni Caning.

Pig-ehemplo kan CEO an nangyaring mga biglaan na makusog na pagbagsak nin uran sa Metro Manila na naging causa nin tubig baha huli kan mga baradong basura kan drainage canal asin posibleng mangyari ini sa ciudad kun dai macooperar an lambang namamanuan.

Kan administrasyon ni dating Alcalde John Bongat nagpakonstruhir na nin storm drainage dawa napapakinabangan na ini mas marhay man giraray magtarabangan an gabos na residentes kan barangay, sabi pa.