HAGAD IBASURA KAN CONGRESO: Grupo kan Muslim contra sa pagbuelta kan death penalty

An Maranao Guild and Solidarity (MGS) Inc., organisasyon nin mga Muslim sa Ciudad nin Naga nagpahayag kan saindang pusog na pagcontra sa pigtutulod ni Presidente Rodrigo Roa Duterte na liwat ibuelta an death penalty sa mga condemadong kriminal particularmente si envuelto sa ilegal na droga.


Sa entrevista kan Bicol Mail ki Mike Mustapa, presidente kan MGS sinabi kaini dawa ano paman na forma nin paggadan sa paagi nin lethal injection asin firing squad mayo sindang naheheling na dahilan nganing iimponer kan gobierno an sentenciang death penalty asin tama lang an life sentence.

Nagtutubod an MGS na dapat magkaigwa muna an gobierno nin reforma sa sistema kan judikatura sa nasyon mantang an apektado digdi si mga pobreng nag-aatubang nin caso kriminal na mayong kakayahan na magkua nin mga de kampanilyang abogado.

Igwa nang mga enot na desisyon kan enot nang pig-imponer an death penalty alagad an kadakli sa mga na-sesentenciahan si mga tios na pig-aacusaran nin caso kriminal.

Yaon kita sa nasyon democracia an justicia para sa gabos asin igalang an deretso humano, sabi pa ni Mustapa.

Sinabi pa na igwang mga heinous crime na dapat atubangon an magabat na penalidad kan jusgado alagad seguradohon an tamang justice system ta herak man kan mga inocente sa caso.

Hagad ninda na ibasura kan congreso an pighuhurot ni Duterte sa pagbuhay kan death penalty.

Enot nang nakalusot sa Camara-Baja sa 17th Congress alagad nagadan sa senado asin ngonian pighuhurot ni Duterte na buhayon an ley.

Pasalamat an MGS sa nagtalikod na kumpisyon matapos ibasura an propuesto sagcod na dagos nang nagadan alagad hagad ninda sa presenting congreso na ibasura an planong pagbuhay kay castigong bitay. An reaksyon na ini kan MGS kasunod kan mga pahayag ni Duterte sa ginibong State of the Nation Address (SONA) kan Hulyo 27, na hinahagad kan Presidente na magpasar nin ley nganing ibuelta giraray an death penalty sa paagi nin lethal injection.

Tolong veces na ini hinagad ni Duterte sa saiyang mga nakaaging SONA na maninigo nang ipasar kan congreso an ley na liwat iimponer an death penalty lalo na si mga nag-aatubang nin caso na may relasyon sa droga.

Retokihon an justice system nganing an justicia para sa gabos, ibasura an propuesto ley sa death penalty, sabi pa.

An comunidad kan mga Muslim yaon sa Barangay Concepcion, Ciudad nin Naga mantang igwa pang grupo sa manlaen-laen na banwaan sa Camarines Sur maging sa iba pang provincia kan Kabikolan. (DPAureus)