PAG-ANDAM SA CALAMIDAD: Pagpurotol manga kahoy pinasikad na kan Casureco II

Pinasikad na kan Camarines Sur II Electric Cooperative (Casureco II) an implementasyon kan Acta Republica 11361 na midmid bilang ‘‘The Anti-Obstruction of Power Lines Act’’, na nag-aawtorisar sa mga cooperative nin electricidad na purotolon an puon nin kahoy dawa mayong permiso sa Department of Environment and Natural Resources (DENR), orog na si delicadong electrical poles asin kuryente.

Dawa contrahon naman kan grupo na nagpapabistong enviromentalists dai nang kaulangan an manijamiento kan cooperativa mala ngani pigpunan na sa Calabanga, Camarines Sur asin isusunod na an itaas na mga barangay kan Ciudad nin Naga.

Saindang pigsusunod na implementing rules and regulations (IRR) na nagluwas kan Marso 2020, matapos aprobaran ni Presidente Rodrigo Duterte an ley kan Agosto 8, 2019.

Ini an mga pahayag sa Bicol Mail ni Rinner Bucay, opisyal na parataram kan Casureco II mantang sainda nang pig-aandaman an panahon kan paglaog nin mga bagyo ngonian na huring cuarto kan 2020 nganing malikayan an mga aksidente na magkaturomba naman an mga poste kun nalamasa an makusog na bagyo. An pagpadagos sa pagputol nin mga kahoy base sa seksyon 7 kan RA 11361 na kabali pa an puon nin niyog alagad dai na kaipuhan magkua pa nin permiso sa Philippine Coconut Authority. An cooperativa mapadara na sana nin kuminikasyon sa maninigong ahencia kan gobierno.

Bako lang mga poste an nadedestroso maging an secondary asin primary lines kan cooperativa na inaabot nin milyones peso an danyos kun nagkakaigwa nin calamidad.

Maging an ribo-ribong miembros-consumedores iyo an mayor na apektado pakatapos kan calamidad huli ta nagkakaigwang halawig na mga aldaw na mayong suplay nin kuryente.

Alagad nin huli ta kulang an saindang personajes nganing maparikas an implementasyon kan ley nagcocordinar sinda sa lokal na gobierno asin sa barangay nganing iyo na an magpurotol kan kahoy kun ini kinakaipuhan na harani sa electrical poles asin linya.

Ginigibo na ini sa LGU Calabanga asin dakul na an nagkaharaling ulang sa linya asin poste alagad an Casureco II iyo an nagbabayad sa mga trabajador, sabi pa ni Bucay.

Sa mga barangay kan Pacol, Carolina asin Panicuason igwa nang mga ginigibong coordinasyon sa opisyales de barangay nganing magkua nin matrabajo na mapurotol kan kahoy, sabi pa.

Kun may distancia man an puon nin kahoy an tinatapyasan an mga sanga nganing dai marapado an mga primary asin secondary lines.

Maging man barisbisan kan mga harong na apektado an poste asin linya kabali sinda sa dapat tapyasan base sa RA 11361. (DPAureus)