DPWH Bicol pinapadalagan kan manga hali sa Rehiyon 8

Ciudad nin Legazpi – Apesar nagkaperang mga Bicolanong opisyal kan Department of Public Works and Highway (DPWH) sa Bicol calificado na magpugol nin halangkaw na posisyon alagad dai natatawan nin prioridad kan saindang opisina sentral na pinamamayohan ni Sekretaryo Mark Villar envez hali sa Rehiyon otso.

Sa sombong kan ibang opisyales kan DPWH Bicol na nagsayuma nang magpasambit kan saindang pangaran, saindang pig-ehemplo si tolong mga Bicolanong district engineers na anas calificado na magpugol kan puestong assistant regional director alagad iginilid sana envez an pigtukahan ni Villar iyo si Gerald Pacanan na dating district engineer kan DPWH 2nd District Engineering Office kan Leyte, sakop kan Rehiyon 8.

Kan nakaaging aldaw nagbalik na sa puesto sa DPWH Bicol na nakatapos nang magkumple kan anom na bulan na suspension kan Ombudsman kan destino pa sa Rehiyon 8, Regional Director Virgilio Eduarte.

An tolong mga Bicolanong interesado sa sinambit na posisyon na nagsumiter pa kan saindang aplikasyon alagad iginilid sana iyo sinda Edilberto Ativo, district engineer (DE) kan Sorsogon; Ricardo Gutierrez, dating DE kan Camarines Norte; asin Simon Arias, an presenting DE kan Albay 1st District Engineering Office.

Sinda Gutierrez asin Ativo parejong pataw-pataw sa ngonian sa opisina rehiyonal.

Kun igwa man Bicolanong napugol nin halangkaw na puesto pigdestino sa Eastern Visayas na pigtukahan ni Villar bilang assistant regional director siring kan nangyari ki dating Masbate district engineer Walter Lubiano.

Alagad dai ngani nag-apat na bulan sa posisyon kasunod kan saiyang mandatory retirement.

Alagad sinabi pa na mayo sindang magiginibo huli ta diskresyon ni Villar kun siisay an saiyang nonombrahan sa arin man na posisyon kan saindang ahencia.