SARADIT NA BRGY., APEKTADO Manga tanod, BHW pinahalian honorarium kan COA hali sa LGU

An saradit na mga barangay na hababa man an saindang annual budget iyo an apektado sa kasugoan kan opisina nasyonal kan Commission on Audit (COA) na pundohon na an pagtao nin counterpart kan mga lokal na gobierno nin dugang na allowance sa mga Barangay Tanod asin Barangay Health Workers (BHW).

Illegal disbursement an isyu kan COA national mantang igwa na sindang narerecibing honorarium cada bulan.

Dawa mamundo an desisyon kan COA padagos an trabajo kan saindang obligasyon sa barangay, nakakaherak man sa sainda ta hababaon na ngani an narerecibing monthly allowance, alagad pinapundo pa, sabi ni Liga ng Barangay President Antonio Beltran asin ex-officio member sa Sangguniang Panlungsod kan Ciudad nin Naga.

Saiyang pig-osipon sa saiya nganing barangay Bagumbayan Norte an saindang tanod asin BHW nagrerecibe sanang honorarium na Php900.00 cada bulan asin Php1,800 iyo man an counterpart kan ciudad.

An dakulang barangay kan Cararayan asin Concepcion Pequeña an saindang barangay tanod asin BHW parejong nagrerecibe nin Php4,000 igwa pang counterpart an ciudad asin gabos sinda kabali sa desisyon kan COA.

Nagsurat na si Alcalde Nelson Legacion sa COA na nagpapaliwanag kan katuyohan kan City Hall na dapat matabangan an mga tios na tanod asin BHW asin maninigo an reconsiderasyon.

Bulan pa nin Hunyo pinapundo kan COA alagad naghahanap na ni solusyon an Sangguniang Panlungsod asin an jefe ejecutivo.

An pagtao nin counterpart kan City Hall pig-implementar kan panahon pa ni dating Alcalde Jesse M. Robredo.

An desisyon na ini kan COA sa gabos na mga lokal na gobierno na nagtatao kan saindang counterpart cada bulan. (DPAureus)