Activista kami bakong terorista, sabi

September 4, 2020

Ini an panindugan kan Bagong Alyansa Makabayan (BAYAN) sa tahaw kan ginigibong red tagging sainda na pigtutubod kagibohan kan National Task Force to End the Communist Armed Conflict, 9th Infantry Division kan Philippine Army sa Bicol asin Philippine National Police. 


Bako lang sinda an pig-aacusaran na mga teroristang grupo envez an mga lider kan Gabriela, Kabataan, Condor-Piston asin Kadamay, sabi ni Nelsy Rodriguez pamayo kan BAYAN Camarines Sur.


Dai pa nagtataong reaksyon an 9th ID na may base sa Camp Elias Angeles, San Jose, Camarines Sur mantang kan apodan kan reporter na ini si Army Capt John Paul Belleza dai nagsisimbag sa saiyang telepono.


Pig-osipon ni Rodriguez an sarong insidente sa barangay San Isidro, Ciudad nin Iriga sa pinaapod na orientation kan 9th ID sa mga residentes kan barangay na an saindang mga retrato pinapaheling asin pinapatubod an comunidad na sinda mga terorista.


Sinabi kan BAYAN CSur na sinda mga lider kan activista na nagiging kritico kan gobierno laban sa kurapsyon, ipiglalaban an deretso humano na iaabuso kan mga awtoridad, paghagad sa gobierno kan tamang sueldo asin kahurotan na tugotan na an mga jeepney operator na magpadagos na kan saindang pagkayog.


Alagad nagiging diskuntento sinda sa gobierno na envez magtabang sa pandemya an mga ahencia nin awtoridad an ginigibo an pag-acusar sa sainda na mga terorista.


Saiya pang pigbuyagyag na nagkapera nang mga insidente nin extra judicial killing na an mga biktima pag-iriba ninda sa progresibong grupo na kinababalihan ninda, Ryan Hubilla kan Kabataan party-list; Karapatan volunteer Nelly Bagasalla kan Sorsogon People’s Organization, sinda parejong taga provincia nin Sorsogon.
Neptali Morada kan Bayan Muna sa Ciudad nin Naga; Randal Echanis kan Anakpawis; asin Chairperson Sarra Alvarez kan Karapatan, Negros. (DPAureus)

Share on Facebook
Share on Twitter
Please reload