DAWA CANCELADO AN MGA ACTIVIDAD: NCPO preparado sa pagdagsa kan mga deboto sa Peñafrancia fiesta

September 4, 2020

An Naga City Police Office (NCPO) nag-aandam kan saindang security plan sa posibleng pagdagsa kan mga may panata asin debotos ni Nuestra Señora de Peñafrancia dawa na cancelado an gabos na mga actividades ni Ina kan Archidiocesis nin Caceres maging kan City Hall sa panahon kan Peñafrancia fiesta.


Ini an mga pahayag ni City Director Col. Marlon Catan kan NCPO mantang kun dagos an mga actividades sa maabot na Viernes, Septiembre 11 iyo an traslacion procession asin sa Sabado, Septiembre 19 iyo an fluvial procession ki Ina.

 

 Sinabi ni Catan sa paagi nin text messages sa Bicol Mail na ma-deploy sinda nin kapupulisan kun igwang mga mapumirit asin madagsang ginatos na debotos na masungko sa mga lugar na pigsusungko ni Ina sa Peñafrancia Shrine asin Naga Metropolitan Cathedral maging sa kapiestahan kan Ina kan Bicolandia sa Septiembre 20 sa Basilica Minore.


Nadagdagan na an fuersa kan NCPO kan magpadara nin dugang na 78 bagong miembros kan Philippine National Police (PNP) an Camp Simeon Ola asin makakadagdag sa pagwarak nin kapupulisan sa mga simbahan kun ini kinakaipuhan.


Kan Septiembre 2 iyo na an pagpuon kan siyam na aldaw na nobenaryo ki Divino Rostro asin sa Septiembre 11 iyo man an pagpuon kan Nobenaryo ki Ina na gigibohon sa Naga Cathedral asin masabay man digdi an mga parokya kan Caceres sa Camarines Sur.


An simbahan asin an lokal na gobierno kan Ciudad nin Naga igwa nang kasundoan na  saindang  cancelado na an  gabos na mga actividades sa Peñafrancia fiesta epekto kan pandemya na sagcod sa ngonian padagos na naglalangkaw an caso kan coronavirus disease.


Kabali sa cancelado sa lado kan simbahan iyo an traslacion asin fluvial procession asin ibang actividades maging sa City Hall an regional street military asin civic parade, trade fair exhibit, Miss Bicolandia Beauty Contest asin dakul pang iba.


Si Alcalde Nelson Legacion nangapudan man sa mga pilgrims asin debotos ni Ina na dai na muna magpasiring  sa ciudad mantang cancelado na an gabos na actividades huli kan pandemya.


Igwa man nin mga nobenaryo sa lambang parokya na dai na kaipuhan magpasiring sa mga simbahan sa Ciudad nin Naga mantang limitado an tawo huli kan social distancing.


An NCPO pina-alerto pa kan jefe ejecutivo nganing pirming andam ano man na oras  na magdagsa an ginatos na debotos hali sa manlaen-laen na mga banwaan. (DPAureus) 
 

Share on Facebook
Share on Twitter
Please reload