HULI KAN PANDEMYA Nagdadakul na mga estudiante nagbabalyo sa mga public school

September 4, 2020

Nagrarani an bulan kan masunod na school year 2020-2021 sa escuelas publica masagad sa 100 por ciento an enrollees hasta sa burokasan nin klase sa Oktubre 5 alagad pigtutubodan an nakadagdag hali sa mga pribadong escuelahan.


Si OIC School Division Superintendent Mariano ‘‘Manny’’ B. De Guzman kan Department of Education (DepEd) sa Ciudad nin Naga nagpahayag na sa pinakahuring enrollees ngonian na semana nag-aabot na sa 97 por ciento sa public schools mantang 83 por ciento sa pribadong mga escuelahan.


Dakul na mga magurang na nagtatrabajo sa abroad maging sa lokal an nawaran nin trabajo nin huli kan pandemya. Kabali na si yaon sa tourism industry an entero man na apektado kaya napipiritan an magurang nganing magpadagos sa pag-escuela an saindang aki pigpalista na sa public schools.


Kun si dating pigtalaan na burokasan nin klase nagrarani na an petsa 24 kan Agosto an pribadong escuelahan nakarehistro sana nin 22 por ciento kumpara sa escuelas publica nag-sasakat sa 80 por ciento.


Naging paborable an desisyon kan saindang central office na i-uktaba sa Oktubre 5, naglangkaw si numero kan enrollees mala ngani sa ngonian harani na sa 100 por ciento alagad sa pribadong escuelahan nakalangkaw man nin 83 por ciento, sabi pa ni De Guzman.


Saro sa ginibong estratihiya kan DepEd tanganing maglangkaw an enrollees iyo an Oplan Balik Eskwela para matabangan na mahanapan nin solusyon si may mga problema sa pagpalista.


An ahencia dai nagsasayuma kan mga estudiantes na mawot magbalyo sa public schools.


Sa datus kan DepEd Naga sagcod kan Agosto 28, alas 8:00 nin banggui igwa nang grand total na 47,736 sa elementarya asin segundarya kabali na sa kinder kumpara kan nagtalikod na taon na 49,299.


Sa Kinder 3,090; elementarya – 24,874, Shs – 16,968; asin sa Shs – 5,894.
 

Share on Facebook
Share on Twitter
Please reload