Salog Naga deklarado bilang class C kan DENR

Salvar Salog kan nakaaging mga administrasyon ngonian Linaw Program katuwang an maabot sa 22 na industriya nganing pangatamanan para sa kalinigan kan salog Naga. (dpa)

An salog Naga na digdi ginigibo an fluvial procession ki Nuestra Señora de Peñafrancia fiesta kun bulan nin Septiembre sarong class C base sa pinakahuring klasipikasyon kan Department of Environment and Natural Resources (DENR) sa Camarines Sur asin dai puedeng karigosan kumpara kan mga nakaaging decada.

‘‘Navigational lang siya harayo sa sinasabing malinaw siring kan Class A’’, sabi ni Provincial Environment and Natural Resources Officer (PENRO), Grace Carino kan DENR sa Camarines Sur kan mag-atubang sa miembros kan prensa sa City Hall.

Nagpatanid an PENRO na kun padagos na mapapabayaan an salog Naga mas lalong mababa an klasipikasyon huli ta igwang mga lugar na pollutant hali sa mga harong asin industria sa palibot kan salog.

Sinabi ni Provincial Environmental Management Unit (PEMU) Officer Lilian Ordino kan DENR Camarines Sur an sarong class C salog base Water Quality Guidelines and General Effluent Standard of 2016 kan DENR, nabubuhayan pa nin sira asin iba pang aquatic resources; maagihan nin baruto, banwitan nin sira asin iba pang kaparejong actividades; puedeng gamiton sa agrikultura asin patubig sa kaomahan.

Saiya pang sinabi na kun kan mga nakaaging decada puedeng karigosan asin labahan alagad sa Class C dai na puede.

Kun nagkakaigwang fluvial procession ki Nuestra Señora de Peñafrancia sa mga may panata sinasabayan nin pagkarigos sa salog kan mga voyadores.

An City Hall sa pamamayo ni Alcalde Nelson Legacion, CENRO Office kan City Hall, DENR asin PEMU sa Camarines Sur nagpirirmahan sa sarong memorandum of agreement sa irarum kan Linaw Program kan ciudad nganing mapangatamanan asin maproteheran an mga lugar na pigdadalihigan nin waste o mga tubig na hali sa mga industriya. Sa kasundoan pigpahayag an magiging obligasyon lambang participante sa progroma.

Sinabi ninda Legacion asin ENRO Officer Engr. Alexander Caning na bakong lang espuersos kan LGU asin mga ka-partners sa Linaw program na mapangatamanan an salog envez an lambang namamanuan lalo na si nag-eestar sa gilid kan salog Naga.

Alagad nagtutubod an jefe ejecutivo na dakulang bagay kun an lambang industria igwang treatment facility nganing malinig na an iluluwas na tubig hali sa mga industria.

An Naga Linaw program o Naga Local Industries Network on Adopt-a-Waterways Program tinawan buhay sa paagi kan executive order 2020-024 na pinirmahan ni Legacion kan Hunyo 19, 2020. (DPAureus)