Augmentation force kan PNP pig-andam sa festividad ni INA

September 12, 2020

Maabot ngonian na semana an 150 miembros kan augmentation force kan Philippine National Police (PNP) kan Camp Semion Ola sa Ciudad nin Legazpi bilang dugang na fuersa kan Naga City Police Office (NCPO) sa pag-andam kan posibleng pagdagsa  kan  mga pilgrim asin mga deboto na may panata ki Nuestra Señora de Peñafrancia.

 

Si Lt. Col. Errol Garchitorena Jr., deputy City Director for Operation kan NCPO nagkunfirmar na naghagad giraray nin dugang na kapupulisan an ciudad nganing maseguro an paz orden sa panahon kan kapiestahan ni Ina dawa na ngani cancelado an gabos na actividades kan Archidiocesis nin Caceres asin City Hall.


Afuera kan augmentation force, igwa pang 78 bagong kapupulisan na nakawarak na sa mga simbahan, mga estratihicong lugar sagcod sa border control kan ciudad kun ini kinakaipuhan na, sabi pa kan NCPO.


Igwa nang nag-aarabutan na mga pilgrim lunad sa duwang bus hali sa Metro Manila na daing coordinasyon sa City Hall mantang nagpuon na an nobenaryo ki Divino Rostro sa Peñafrancia Shrine kan Septiembre 2 asin an nobenaryo ki Ina mapuon man sa Septiembre 11 sa Naga Metropolitan Cathedral.


An mga parokya kan Caceres sa Camarines Sur magsasarabay sa ginigibong nobenaryo ki Ina alagad nag-aandam an NCPO asin City Hall sa seguridad mantang deficil masunod an health protocol kun dagsa na an mga tawo sa simbahan.


Si Alcalde Nelson Legacion nagpaluwas man nin direktiba sa NCPO na dugangan an idedestinong kapupulisan sa mga border control sa linderos kan Del Rosario, Ciudad nin Naga asin sa Pili, Camarines Sur asin Mabolo-Milaor.


Nagpatanid pa an jefe ejecutivo na magiging estricto an awtoridad sa travel permit asin iba pang dokumento asin kun mayo kaini dai sinda tutugotan na makalaog sa ciudad.


Alagad dinagdag pa ni Legacion huli kan saindang kasundoan kan simbahan na cancelado na an gabos na actividades sa kapiestahan ni Ina dapat sanang maintindihan kan mga deboto na ibitaran na muna na magpasiring sa Naga sa tahaw kan krisis ngonian sa Covid 19. (dpa)

Share on Facebook
Share on Twitter
Please reload