Project TABANG piglansar sa CSur

September 12, 2020

Piglansar na sa tercer distrito kan Camarines Sur an Transforming Affected Barangays and Needy Group (Project TABANG) sa pagtabangan kan District Office ni Congressman Gabriel H. Bordado Jr. asin kan Naga College Foundation nganing matabangan an grupo sa mga barangay sa paagi kan livelihood projects o maging sadit na pagnenegosyo.


Nahingoha an proyekto  tanganing makatabang sa mga apektado kan pandemya sa mga barangay sa Camarines Sur. 


Nagkaigwa nin pirirmahan  sa Memorandum of Agreement (MOA) na ginibo kan Sabado, Septiembre 5 sa board room kan Naga College Foundation na pinangenotan ninda Congresista Bordado asin NCF President Mario C. Villanueva asin kabali sa actividad sinda dating Alcalde Abang Mabulo kan San Fernando, CamSur (Chief of Staff ni Bordado), Atty. Carlo Villanueva Jr. (NCF Chairman of the Board), Dr. Roger Villanueva (NCF Chief Finance Officer) asin NCF Board Members Rudy Baldemor asin Melvin del Puerto. 


Sa entrevista ki Bordado, saiyang sinabi na saro sa saindang gigibohon iyo an pagkaigwa nin training program na itatao sa mga miembro comunidad si mga dapat nindang maaraman kun panong mapapadalagan an sarong sadit na negosyo maging sa livelihood project, kun pano sindang magkakasararo sa tahaw kan krisis ngonian na panahon asin may ilalaag sindang mga proyekto.

PROJECT TABANG. MOA Signing sa Project TABANG pinapaheling an dokumento ninda (nakatukaw hali sa wala) Atty. Carlo Villanueva Jr. (NCF Chairman of the Board), Congresista Gabriel H. Bordado Jr., Mario Villanueva (NCF President) asin NCF Board Member Rudy Baldemor. Nakatindog sinda (hali sa wala) Roger Villanueva (NCF Finance Officer) dating Alcalde Abang Mabulo (Chief of Staff ni Congresista Bordado), asin Melvin del Puerto NCF Board Member. (mic Martinez)
 


An grupo o organisasyon pueding magpadalagan kan community savings project asin maging iba pang proyekto na direktang makaka-apektar sa buhay kan tawo.


Alagad an Project TABANG  maconducir muna nin training/seminar nganing maintindihan kan mga partisipante asin matukdoan sinda nin paagi sa pagkapot nin proyekto tanganing magdanay sa maarabot na aldaw.


Sinabi pa ninda Bordado asin Villanueva an proyekto ninda bako lang ngonian na panahon kan pandemya kundi pang-habang buhay an target na matawan sinda nin asistencia an mga tawo sa tercer distrito.


Sa lado kan NCF, igwa na sindang pigplano para sa feasibility study na gagamiton pagabot sa comunidad. Yaon sa sainda an theory asin yaon pa sa sinda an ‘‘actual practice’’.


An tercer distrito kan Camarines Sur igwang walong local government unit kabali na an Ciudad nin Naga na dapat pakarhayon an pag-training sa grupo alagad igwang regular na pag-monitor nganing ma-evaluar an proyekto, sabi pa kan representante kan tercer distrito.


Sinabi pa ni Villanueva an proyekto ninda igwa nang mga na-enot na nag-asensong grupo na saiyang pig-halimbawa si organisasyon nin Parahilot sa Magarao, Camarines Sur.


Sa saindang programa dapat sa laog nin sarong taon maheling na an epekto mala ngani an organisasyon nin parahilot nag-invest pa sa ibang negosyo, sabi pa ni Villanueva.


An konsepto na nasa likod kaini komo an saindang kolehiyo an misyon para public service corporate, social responsibility nganing makatabang mantang kadakli kan saindang estudiantes hali sa class ‘‘C and D’’ para sa saindang benipisyo sa familia arog na sa ngaran na  edukasyon, sabi pa kan pamayo kan NCF. (DPAureus) 

Share on Facebook
Share on Twitter
Please reload