Mga activista padagos na iniipit kan gobierno, sabi

Na-aalarma na an progresibong grupo sa Bicol sa sunod-sunod na pangraramal kan PNP, Philippine Army asin CIDG sa saindang mga lider sa akusasyon na envuelto sa casong murder sa soldados kan 9th ID apesar na dai ninda aram kun panong nakabali sa caso kriminal.

Sarong pang-iipit kan gobierno sa saindang mga lider apesar na mayong inbestigasyon sa akusasyon sa casong murder mayong subpoena asin preliminary investigation alagad inaarestar armado na nin mandamiento de aresto an awtoridad nganing dakopon asin ikunkun sa carcel na mayong fiansa, sabi ni Dan Balusio an secretary-general kan Bagong Alyansa Makabayan (BAYAN) sa Bicol.

Magkasunodan sanang inarestar sinda Nelsy Rodriguez, chairperson kan BAYAN CSur mga alas 9:45 banggui, Doming, Septiembre 6 sa saiyang residencia sa Bagumbayan Sur, Ciudad nin Naga asin kan Lunes, Septiembre 7 alas 3:20 nin hapon dinakop man kan Daraga Municipal Police Station, Daraga, Albay si Ramon Rescovilla, deputy secretary general kan Condor-Piston mantang papulion na sa saiyang residencia sa Daraga.

INDIGNATION RALLY. Grupo kan BAYAN, Anakbayan asin iba pang lider kan mga activista pigpoprotesta ninda sa atubangan kan NCPO an cuestionableng pang-aarestar ki Nelsy Rodriguez na detinido sa Police Station 1.

Sinda dinakop kan mga awtoridad armado nin mandamiento de aresto na pig-isyu kan Hulyo 2020 ni Juez Arniel Dating kan Regional Trial Court Branch 32 kan Labo, Camarines Sur sa casong murder.

Dai palang nahahaloy an saindang pag-iriba sa progresibong grupo na sinda Pastor Danny San Andres parataram kan Karapatan Bicol asin kan United Church of Christ in the Philippine sa Sipocot, CSur asin Jenelyn Nagrampa kan Nabua, CSur asin lider kan Gabriela inarestar huli sa casong double murder sa sahot na panhihipa sa duwang soldados na nangyari sa Ragay, CamSur. An duwa inarestar base sa mandamiento de aresto na pig-isyu kan jusgado.

PALIWANAG KAN 9th ID

Si Army Captain Paul John Belleza, parataram kan 9th Infantry Division kan Philippine Army sa Bicol na may base sa Camp Elias Angeles, Pili, Camarines nagsabi an duwa acusado sa casong murder huli sa pagkaka-envuelto sa paghihipa sa sarong opisyal kan militar sa Labo, Camarines Norte.

Saiyang piglinaw kun naenvuelto sinda sa caso kriminal dai man na-ngangahulogan na mayo sinda sa lugar kan insidente alagad puedeng kabali sinda sa pagplano kan krimen, kaya envuelto sinda sa caso.

Nag-aagi sa proceso legal, nagconducir nin preliminary investigation an fiscalia, igwang affidavit an mga testigos contra sa sainda asin nahelingan nin probable cause kan jusgado nganing magpaluwas nin mandamiento de aresto, sabi pa ni Belleza.