0.75 metro distansya sa PUV mapeligro sa virus

Dai hinahale an peligro sa salud an desisyon kan Department of Transportation (DOTr) na ibaba sa 0.75 metro envez kan orihinal na sarong metro an physical distancing sa mga pasajeros kan public utility vehicles (PUV) sa tahaw kan mga pagcontra kan health expert asin mayong rekomendasyon an Who Health Organization (WHO) asin kawaran pa nin bakuna sa coronavirus disease.

Ini an panindugan kan Condor-Piston nasyonal maging digdi sa Bicol, sabi ni Joel Pillogo, lider kan sektor nin transporte sa Camarines Sur.

Saindang pigbuyagyag an intensyon kan DOTr nganing isalbar an saindang negosyong jeepney modernization program.

Pampasajerong jeepney na viajeng Naga-Calabanga mantenido an dating sukol sa physical distancing kan saindang pasajeros. (dpa)

Sinabi ni Pillogo bilang lider kan Condor-Piston asin sa pagtubod kan saindang pag-iriba, nalulugi sa physical distancing para sana sa 50 por ciento kan capacidad nin pasajeros an korporasyon asin fleet operator na na-enganyar kan DOTr na magbakal nin mamahalon na cantidad nin modern jeeps.

Dai sinda nakakabayad, nag-aatubang na nin patong-patong na amortization sa modern jeep na mini bus.

Nganing makabayad sa amortization asin iba pang kautangan nagdesisyon an DOTr na gibohon nang 0.75 metros an distansya kan mga pasajero alagad isasakripisyo an salud kan publiko, sabi pa kan Piston.

Maging an pasajeros pabor na dapat imantenir giraray sa sarong metro distansya para man sana sa proteksyon sa salud asin maging an kadakle sa mga tsuper asin operator.

Sinabi pa ni Pillogo mayo pa sa plano kan mga jeepney operator na ibaba sa 0.75 an physical distancing mantang kun sa presente an saindang sukol sa distansya mga kabangang metro sana.

An dapat gibohon kan gobierno magtao nin fuel subsidy sa transport sector nin huli ta apektado pa sinda kan pandemya mantang kulang an mga pasajero.

Kun iimplementar an 0.75 meter dapat tugotan na an gabos na tradisyonal na jeepney na magkarayod. (dpa)