COA ‘laban, bawi’ sa biyaya kan manga tanod, BHW

September 18, 2020

Tinugotan giraray kan Commission on Audit (COA) an lokal na gobierno kan Ciudad nin Naga nganing ibariwas an saindang ‘counterpart’ sa narerecibing bulanan na honorarium kan mga barangay tanod asin Barangay Health Workers (BHW), alagad sa panahon sana nagdadanay an pandemya.


Temporaryo sanang ibinabalik alagad kun matapos an pandemya mapanday giraray nin resolucion an Sanggunian Panlungsod nganing hanapan nin solusyon.


Ini an mga pahayag ni Liga nang Barangay President asin ex-officio member kan sangguniang Antonio ‘Dodit’ Beltran asin puedeng makobra an apat na bulan na binawi kan COA puon kan Hunyo hasta Septiembre 2020.


Saiya pang sinabi na sinda sa SP nagpasar nin resolucion na naghahagad nin reconsiderasyon sa COA na bilang mga ‘’frontliners’’ an mga tanod asin BHW dapat matawan nin tabang kan City Hall nin huli ta dakulang bagay sinda ngonian na padagos naglalangkaw an caso sa coronavirus disease (Covid 19).


Pinaboran kan COA an saindang hinahagad na reconsiderasyon alagad may kulatilya oras na matapos na an pandemya dapat pundohon na an pagtao nin ‘’counterpart’’ mantang prohibido ini sa guidelines kan komisyon, sabi pa ni Beltran.


Sinabi pa kan Liga President panahon pa ni dating Alcalde Jesse M. Robredo nagtataong counterpart na honorarium an City Hall sa mga barangay tanod asin BHW, alagad nabigla sinda kun kasuarin kaipuhan an serbisyo ninda bilang mga ‘‘frontliners’’ babawian nin bulanan na allowance an isyu  kan COA ‘‘illegal disbursement’’.


An enot na desisyon kan COA apektado si saradit na mga barangay na dikit sana an saindang annual budget kaya hababa man an narerecibing honorarium.


Saiyang pighalimbawa sa saiyang brgy. Bagumbayan Norte, nagrerecibe sana nin P900.00 na honorarium an saindang tanod asin BHW cada bulan asin babawian pa nin P1,800.00 monthly counterpart kan City Hall.
Marhay digdi si dakulang barangay na nakakatao nin sagcod sa P4,000.00 na bulanan na honorarium.


Antes kan resolucion kan SP si Alcalde Nelson Legacion nagsurat sa COA nagpapaliwanag kan saindang katuyohan nganing matabangan an mga tios na tanod asin BHW na maninigo an reconsiderasyon kan komisyon.


Nagsunod an resolucion kan SP sagcod na inaprobaran an kahagadan. (dpa)

Share on Facebook
Share on Twitter
Please reload