SIMBAG SA WORLD SUICIDE PREVENTION DAY: BF naghihiro vs depresyon

September 18, 2020

An Bantay Familya (BF) igwa nang grupo nganing matabangan asin maagapan an mga nagsasapong depresyon asin posibleng maghugot sa tahaw kan inaatubang na krisis sa pandemya mala ngani igwa nang 37 casong nagpakagadan sa Camarines Sur dai pa kabali an tolo hali sa  Ciudad nin Naga. 

 

Igwa na sindang grupo nin facilitator na dating nakatutok sa mga nagsurukong adik sa ilegal na droga na pigpapasa-irarum sa counseling na pinapadalagan kan saindang psychologist alagad kaipuhan mag-training giraray antes maging aktivo nganing maagapan an arin man indibiduwal laban sa sinasapong depresyon.


Afuera sa BF volunteers igwa nang nag-alok kan saindang serbisyo na kinababalihan nin retiradong paratukdo asin mga empleado kan gobierno.


Kan Septiembre 10 iyo an pagcomemorar kan World Suicide Prevention Day, alagad sa Camarines Sur hali sa listahan kan PNP Provincial Office igwa nang 37 caso nin mga naghuhurogot afuera kan tolo sa Ciudad nin Naga puon kan Enero hasta ngonian na Septiembre na panahon kan moderate community quarantine.  


Ini an mga pahayag ni Bise Alcalde Cecilia ‘’Nene’’ De Asis, nagpundar kan 25 años nang Bantay Familya sa  Ciudad nin Naga asin pig-aadaptar naman ini sa ibang mga banwaan.


Kaipuhan an kooperasyon kan magurang o mahal sa buhay nganing makaulay sa telepono kan BF volunteer an arin man na nag-aatubang nin mental health problem asin igwa nang ginibo kaini an saindang grupo, sabi pa ni De Asis.


An BF Counselor on call dawa anong oras puedeng simbagon mantang gigibohon ini sa paagi nin phone patch, alagad igwang dapat sunodon dai basta kakaulayon maagi sa tamang proceso sa tamang dalan nin pag-uurulay dai basta mag-tao nin advice, ginibo me na ini sa mga nagsurokong adik sa droga, sabi pa. 


Ngonian na panahon nin pandemya, tolo nang magurang an nagdulok asin naghagad nin tabang sa BF na kinababalihan nin babae na nagsasapo nang depresyon sa rason na dai nakakaluwas sa saindang residencia asin dai  naheheling an mga ka-klase sagcod na dai naheheling an saiyang boyfriend, sarong ina na nagtatrabajo sa ibang nasyon na problemado sa saindang familia sa Ciudad nin Naga na nagniniloko an agom na lalaki asin iba pang magabat na problema.


Kan magbungkaras an pandemya, an National Center for Mental Health naka-record na nin padagos na paglangkaw cada bulan kan mga nag-aapod sa saindang hotline, hali sa 80 nag-abot na sa 400, kabali digdi si nagsasapong depresyon asin si posibleng maghugot. (DPAureus)

Share on Facebook
Share on Twitter
Please reload