Historia kan martial law pigtutukdo kan DepEd
Dai man inabut kan mga jovenes an panahon ni dipuntong Presidente Ferdinand E. Marcos an mga mapait na nangyari sa saiyang veinte años sa Malacañan sagcod naging diktador asin nagdeclara nin martial law kan Septiembre 21, 1972 alagad nagdadanay na dai nalilingawan kan bagong henerasyon.
An historia kan martial law sagcod nagkaigwa nin people power revolution asin napatagbang sa Malacañan si Marcos kaayon na sa subject kan ‘Aralin Panlipunan’ parte kan historia asin kabali sa curriculum sa elementarya asin segundarya.
Ini an mga pahayag sa Bicol Mail ni City School Division Superintendent Manny De Guzman kan Department of Education (DepEd) sa Ciudad nin Naga sa tahaw kan ginibong ika-48 anibersaryo kan declarasyon kan martial law sa Filipinas ni Marcos kan 1972.
Si mga agi-agi kan pagpadalagan kan dipuntong diktador dawa dai na inabut ngonian kan mga jovenes alagad pigtutukdo man giraray kan DepEd maging sa mga pribadong escuelahan.
Maging kan primerong people power revolution kan panahon ni dipuntong Presidente Corazon C. Aquino kabali ini sa pigpapagirumdum sa estudiantes sa paagi kan ‘‘Aralin Panlipunan’’.
An historiang ini sa Filipinas bantugan sa enterong kinaban na nagkaigwa nin rebulosyon alagad mayong nagbulos nin dugo sagcod na pinalayas an diktador sa Malacañan.
Nagkaigwa nin mga selebrasyon kan martial law alagad sa paagi nin mga protesta nin mga jovenes asin estudiantes sa manlaen-laen na ciudades asin mga provincia nganing kundenanor an mga nangyaring extra judicial killing asin iba pang mapait na insidente sa namamanuan Filipino.
Namumundo an mga nagpoprotesta huli ta nakakabalik naman sa puesto elihido an familia Marcos. Sinabi ni Khryss Aranas, lider kan Anakbayan sa Ciudad nin Naga an saindang protesta nganing maaraman kan publiko na dapat dai ta lingawan an ley martial na enterong pigtinaktinakan ni Marcos an demokrasya asin hinalian nin deretso an namamanuan.
Alagad namumundo sinda nin huli ta mas malala pa an administrasyon Duterte mala ngani igwa nang Terrorism Law na mas ‘‘masahol pa sa martial law’’, sabi pa. (dpa)
PROTESTA VS SEPTIEMBRE 21. Kinundenar kan mga progresibong grupo, jovenes asin estudiantes sa Ciudad nin Naga asin Camarines Sur an ika-48 anibersaryo kan martial law na dapat dai malingawan an mapait na pagpadalagan kan dipuntong diktador Marcos. An protesta ginibo sa Plaza Rizal asin pinangenotan kan Anakbayan, BAYAN, Gabriela asin iba pang mga lider activista.