Sa DepEd: Mapanday reglamento contra cyber bullying

October 2, 2020

Mapanday nin reglamento an Departamento de Edukasyon (DepEd) laban sa cyber bullying na puedeng mabiktima an estudiantes na nakatukaw sa online classes.


Dawa igwa nang Child Protection Law alagad nin huli kan posibleng mangyaring cyber bullying sa mga estudiantes sa panahon kan erescuelahan maninigo digdi na magpanday nin mga reglamento nganing iyo an iimplementar.


Sinabi ni DepEd City School Division Superintendent  Manny De Guzman kan Ciudad nin Naga na nakatalaan magpaluwas nin guidelines asin mga reglamento an saindang opisina central nganing iyo an iimplementar.


Alagad nin huli kan mga modular learning asin online classes mantang mayo na nin face-to-face learning sa mga classroom kaipuhan an suporta kan mga magurang contra sa cyber bullying para sa proteksyon kan saindang aki.


Sa manga pag-aadal, an bullying igwang epekto sa pag-adal kan mga estudiantes sagcod na iba an pagtrato sa sainda kan mga paratukdo maging ka-klase bakong patas.


An bonga kaini daing gayo sinda nagpaparticipar sa mga klase nin huli ta maluya an pagtubod sa sadiri. 


Dawa an iba niyang mga ka-escuela daing gayo na nakiki-amigo sa saiya mantang na-iiba an atitud.


Kun dai tolos ini mareresolberan kan magurang asin escuelahan o paratukdo dakulang negatibong epekto sa pobreng estudiante.


Maresulta sana ini sa hababang mga grado asin dai magiging produktivo asin masasayang an saiyang futuro sa edukasyon.


Mapuon pa sana an erescuelahan sa Oktubre 5, saro ini sa tatawan nin atensyon kan DepEd, sabi pa. (dpa)

Share on Facebook
Share on Twitter
Please reload