NFA buying stations supay na nin paroy

October 9, 2020

Pili, Camarines Sur  --- Nagsusupay na an mga buying station kan National Food Authority (NFA) sa Camarines Sur mala ngani nagbukas na nin bagong buying station sa brgy. Talibtib, Canaman, CSur alagad nagpapadagos an saindang palay procurement.


Sa bodega kan buying station sa Tigaon, CamSur na igwa sanang 12  mil na cavan na maximum capacity asin an duwang bodega sa Ciudad nin Iriga mapapano alagad an pagbakal nin paroy magpapadagos mantang pagkahapon hahakuton kan saindang truck nganing darahon asin sarayon sa mahiwas na bodega sa Palestina, Pili, CSur.


Ini an mga pahayag sa Bicol Mail ni Assistant Provincial Manager Nora Follusco mantang panahon  nin aranihan puon kan Agosto hasta Oktubre ribo-ribong cavan nin paroy an binabagsak sa saindang pitong mga buying station kabali na sa brgy. Palestina, Pili, CSur.


An saindang average sa dating 5,600 na cavan envez inaabot na nin 8,500 hasta 9,000 cavan nin paroy aroaldaw asin ini hali sa gabos na buying stations kan Camarines Sur.


An iba pang mga bodega sa Libmanan igwang 80 mil na cavan na maximum capacity, sa Cabusao - 100 mil na cavan, haros labi na sa cincuenta por cientong napapano asin an bagong buying station sa Canaman igwang capacidad na 60 mil na cavan.


Pig-aandaman kan NFA na mag-arkila pa nin dugang na bodega nganing magpaseguro oras na mapuno na an saindang bodega sa brgy. Palestina, alagad kun mayong lugar sa Camarines Sur sasarayon muna sa bodega posible sa kataid na provincia kan Camarines Norte.


Nagpipirila an mga paraoma sa saindang mga buying station nin huli ta binabakal ninda an alang na paroy nin P19.00 cada kilo asin nagdudulag na an mga paraoma sa pribadong kumprada huli sa bagsak an presyo.


Sinabi pa ni APM Follusco na sagcod sa bulan nin Deciembre 2020 target ninda na makabakal nin 540,000 cavan. 


Sa kaparehong entrevista, pinahimutikan kan NFA na igwa na sindang palay procurement on wheels mantang kulang ngani an saindang service truck. (DPAureus)
 

Share on Facebook
Share on Twitter
Please reload