2nd batch nin SMEs sa Business Stimulus Program pigngaranan

October 16, 2020

Pagkatapos nin sobra sa duwang semana, liwat na nagpaluwas nin listahan nin beneficiaries an LGU Naga para sa zero-interest loan kan 13 na small and micro entrepreneurs sa ciudad.  An tabang sa mga SMEs igwa nin katuyuhan pakusogon liwat an saindang mga negosyo sa tahaw kan krisis na dara kan pandemya.


Enot kaiyan, 11 na negosyante  an nagbenepisyo kan siring na asistencia sa paagi kan pigtataong zero-interest loan kan gobierno-lokal sa lindong kan Naga City Business  Stimulus Program.

An programa, sarong lakdang kan LGU Naga sa pangengenot ni Alkalde Nelson Legacion na igwang katuyuhan tabangan an mga saradit na negosyante na makabawi sa kapierdehan na saindang sinapo huli kan pandemya.


Kasoodma, sa halipot na programang ginibo sa City Hall grounds pagkatapos kan flag-raising ceremony, pigtao sa mga beneficiaries an saindang mga cheke na may  kantidad  poon P25,000 hanggan P100,000, depende sa negosyo asin kakayahan nindang magbayad.


An retrato sa ibaba pigpapaheling an saro sa 13ng SMEs na minakompuesto kan ikaduwang batch kan mga beneficiaries kan programa asin mga opisyales kan LGU Naga sa pangengenot ni Alkalde Legacion. 

Share on Facebook
Share on Twitter
Please reload