Calabanga, CSur premirong benipisyaryo kan CLH proj

An Sangguniang Kabataan (SK) kan Barangay Sabang, Calabanga, Camarines Sur iyo an enot na benipisyaryo kan desktop computers sa Camarines Sur sa lindong kan Community Learning Hub (CLH) project kan opisina ni Vice Presidente Leni Robredo alagad ini puede pang magamit kan Barangay Council.

An desktop computer narecibe na kan SK sa pamamayo kan saindang chairman Cathy Makawili sa presencia kan mga opisyales de barangay matapos kan ginibong simpleng ceremonial turn-over kan mga staff kan OVP sa pamamayo ni Babet Lavadia, Senior Area Officer kan Angat Buhay program.

Retrato sa wala, desktop computer na pigdonar kan Office of the Vice President (OVP) sa SK Council kan Barangay Sabang, Calabanga, Camarines Sur. Retrato sa too mga staff kan OVP sa pamamayo ni Babet Lavadia, Senior Area Officer kan Angat Buhay program ni VP Leni Robredo na nag-turn over kan desktop sa Brgy. Sabang.

Sinabi ni Lavadia an laptop o desktop magagamit sa mga research program kan barangay asin kan jovenes. Ka-partner kan OVP sa CLH project iyo an Bicol Limpok Association na nagsusuporta sa proyecto kan bise president bilang partners asin volunteers sa pag-establiser kan learning hubs sa manlaen-laen na rehiyon asin provincia nganing matabangan an manga estudiantes asin paratukdo sa mga envuelto sa online learning sa tahaw kan coronavirus disease pandemic.

An programang ini kan OVP makakatabang sa lugar na mayong marhay na serbisyo kan kuryente asin mayong internet connection.

Pigpahayag pa kan OVP na an sunod na makakarecibe nin donasyon iyo an banwaan nin San Fernando, Camarines Sur sa paagi ni dating Alcalde Abang Mabolo.