NCPO higot na ipapaotob an kasuguan kan IATF sa undas

October 16, 2020

Plantasyon nin burak sa brgy. Pacol, Ciudad nin Naga kulang nin mga parabakal mantang apektado kan pandemya asin lockdown an mga kamposanto sa Oktubre 29 hasta Noviembre 4. (dpa)
 

 

Dawa sarado an mga kamposanto poon petsa 29 nin Oktubre sagkod petsa 4 kan Noviembre, ngonian na taon, susog sa ipigsusugo kan Inter Agency Task Force, preparado man giraray an personahes kan Naga City Police Office na bantayan an mga kamposanto tanganing higot na ipaotob an nasambit na kasuguan.


Ini an pigpahayag ni PCol. Errol Garchitorena, deputy city director for operations kan Naga City Police Office (NCPO), dapit sa pagpaotob kan IATF Resolution No. 72 na pig-oyonan kan LGU Naga.

Sa kamawotan na maipaotob na toltol an resolosyon, pigmarhay ni Alkalde Nelson Legacion na magpaluwas nin talaan o schedule nin pagbisita kan mga tao sa mga kamposanto magin residente man sinda kan ciudad o kan mga banwaan na boot magbisita sa kapamilya o kabistong piglobong sa laog kan ciudad.


Piglaag kan Health Emergency Response Task Force sa laog kan Oktubre 12 hanggan 28 an pagbisita sa mga kamposanto, alagad, babantayan kan pulisya asin mga pag-iribang force multipliers na dae maglampas sa 30% kan venue capacity an numero kan mga taong malaog nin sarabay sa kada lobongan.


Pigpahayag ni Garchitorena na kabali sa pagpaotob kan mga bagay na dati nang ipinagbabawal sa laog kan sementeryo, iyo an pagpaotob kan minimum health standards sa kamawotan na limitaran an pag olakit kan coronavirus disease 2019.


Sinabi pa kan opisyal kan Naga PNP na pigbilog ninda an Theft and Robbery Section kan NCPO tanganing mapangatamanan an mga gamit asin propiedad kan mga tao na sibot sa saindang pagbisita sa mga kamposanto.


Pigpatanidan pa ni Garchitorena an mga residentes kontra sa operasyon nin mga maraot na elemento nin sociedad siring kan Akyat-Bahay, Basag-Kotse, asin Bukas-Kotse. 

Share on Facebook
Share on Twitter
Please reload