NCPO madestino mga pulis sa kamposanto
Nagwarak na nin mga miembros kan Naga City Police Office (NCPO) sa mga pribado asin pampublikong kamposanto nganing limitaran sa treinta por ciento (30%) an dapat maglaog sa mga kamposanto puon kan Oktubre 12 hasta 28.
An direktiba pinaluwas kan Health Emergency Response Task Force kan City Hall na nagsasabi pa na mayong tutugotan maglaog puon sa Oktubre 29 hasta sa Noviembre 4.
Sinabi ni City Director P/Col. Marlon Catan kan NCPO na si sangatos na kapupulisan na pinadara kan Camp Semion Ola sa Peñafrancia festival kan Septiembre 2020 dai na pinabalik sa Ciudad nin Legazpi asin sinda an gagamiton sa pagmantenir kan paz y orden asin dugang na fuersa hali sa regular na miembros kan NCPO.
An Inter-agency Task Force on Emerging and Infectious Disease (IATF-EID) enot nang nag-isyu kan resolusyon numerado 72, na dapat limitaran an numero kan mga mabirisita sa kamposanto hasta sa treinta por ciento.
An duwang pribadong kamposanto an Sto Niño Memorial Park asin Eternal Garden na parejong yaon sa barangay Balatas, kabali sa dedestinohan nin kapupulisan alagad puedeng dublehon an idedestino sa pampublikong kamposanto sa barangay Concepcion Pequeña na perming dakul an mga nagbibisita bubugtakan pa nin ilaw kan City Hall asin miembros kan traffic police asin PSO.
Ini an estrictong iimplementar kan Naga City Health Emergency and Response Task Force alagad nagpaluwas man nin mga petsa kun anong aldaw sinda dapat magbisita sa mga kamposanto an residentes kan ciudad.
Puon sa Oktubre 12 hasta 14 iyo an pagbisita kan mga residentes kan barangays; Abella, Bagumbayan Sur asin Norte, Balatas asin Dayangdang.
Sa Oktubre 15 hasta 17 an mga residentes kan barangay Calauag, Cararayan, Carolina, Liboton Del Rosario asin Sta Cruz.
Sa Oktubre 18 hasta 20 an mga residentes kan barangay Mabolo, Pacol, Tabuco, Tinago, Dinaga, asin Igualdad.
Sa Oktubre 21 hasta 23 an mga residentes kan barangay Concepcion Grande asin Pequeña, San Francisco, asin San Isidro.
Sa Oktubre 24 hasta 26 an mga residentes kan barangay Lerma, Panicuason, Peñafrancia, Sabang, San Felipe asin Triangulo asin sa Oktubre 27 hasta 28 si mga bisita hali sa Camarines Sur.
Nagtalaan man nin oras sa paglaog sa mga kamposanto puon alas 6:00 nin aga hasta alas 8:00 nin banggui.