Nat’l roads raradason bike lane kan DPWH

October 30, 2020

An gabos na bagong pigcoconstruhir na mga patinampo asin tulay kan Department of Public Works and Highways (DPWH) magkakaigwa nang bicycle facilities an gilid kan national roads asin dapat pararejo an desinyo nganing maseguro an seguridad sa tinampo kan mga nagbibikselta.

 

Igwa nang direktiva si DPWH regional director Virgilio Eduarte sa mga district engineers sa Kabikolan kasunod kan pinaluwas na Department Order No. 88 kan Septiembre 29, 2020 ni Sekretaryo Mark Villar na nagtataong guidelines kan desinyo kan bicycle facilities.


Sinabi kan direktor an gabos na proyecto kan obras publika na envuelto an bagong kontruksyon nin mga tinampo asin tulay siring kan mga road widening project, pigmamando sa memorandum order na bugtakan nin desinyo para sa bicycle facility na dapat basehan sa gigibohon na pag-aadal kan departamento.


Alagad puedeng magkaigwa nin exemptions na depende sa gigibohon na evulasyon kan Bureau of Design na kaipuhan maagi sa approval kan Undersecretary for Technical Services.


Sa Ciudad nin Naga, igwa nang ordinansa na inaprobaran kan May 16, 2017 na nag-dedesignar sa nagkaperang mga kalye sa pagbugtak nin bicycle lane na may lakbang nin 1.5 metros.


Alagad limitado an binugtak na mga bicycle lane sa centro kan ciudad mantang kadakli mga hayapit an city roads.


Sa ngonian nagkaperang mga road widening project sa Ciudad nin Naga na pig-iimplementar kan DPWH asin makakabali na ini sa bagong desinyo kan proyecto.


Igwa nang pigbilog na bicyclist organization si Alcalde Nelson Legacion mantang nagdadakul na an mga parabisikleta sa ciudad antes pa kan Covid-19 pandemic na dakulang bagay sa transportasyon asin makakabawas pa sa hibog kan trafico. (dpa) 

Share on Facebook
Share on Twitter
Please reload