Bagong patinampo sa Naga pipinturahan bike lane

An icoconstruhir na Calauag-San Felipe circumferential road, Almeda Mabulo bypass road maging iba pang bagong patinampo kabali sa mga tatawan nin buelo nganing pinturahan bike lane.

Si Consejal Vidal Castillo, pamayo kan Committee on Infrastructure sa Sangguniang Panlungsod nagpahayag na ini an bago nindang iimplementar sa mga proyecto sa patinampo mantang saindang babasehan an Naga Bike Ordinance na inaprubaran pa kan Mayo 16, 2017.

Enot pa an City Hall sa bagong mandato ngonian kan Department of Public Works and Highways (DPWH) na an gabos nindang iimplementar na national road asin tulay dapat igwa nang bicycle lane.

Maheheling sa nagkaperang porsyon kan Panganiban Drive na nagbugtak na nin bicycle lane alagad kulang pa mantang nauulang pa kan manga poste kan Casureco II na nakakaulang sa road widening project kan Department of Public Works and Highways (DPWH).

Afuera kan seseguradohon an road safety kan mga para besiklta makakatabang sa ‘‘economic recovery’’ mantang makakabuelo pa sa mga empleado sa sadiri nindang transportasyon na mayong gastos sa flete aroaldaw huli ta pacil na an saindang viaje, sabi pa ni Castillo.

Nakakaseguro pa sinda sa ‘‘safe physical distancing’’ makakalikay pang maulakitan nin coronavirus disease (Covid-19).