Buhay kan mga residente sa tubig baha naisalbar kan FB
RESCUE OPERATIONS. Si Jerold Pena, Chief of Staff ni Diputado Arnie Fuentebella (naka-jacket nin asul) pig-aalalayan isakat sa dump truck an mga menor de edad na saindang pigsasalbar sa hararum na tubig baha sa Brgy. Dolo, San Jose, Camarines Sur. (CONCINA FB)
San Jose, Camarines Sur --- Nakasalbar sa peligro an buhay kan labi sa viente (20) residentes kan barangay Dolo sa banwaan na ini kun bako sa pig-post sa Face book kan duwang friends hali pa sa Metro Manila ni Municipal Councilor Audie Concina sagcod nagkaigwa sinda nin cinco minutos na ‘‘chat’’ kun panong makukua an lugar asin pagsapwat sa naghahagad nin tabang sa nagrararum na tubig baha nin huli kan bagyong ‘‘Ulysses’’.
Dai nakaandam an apektadong mga residente sa dai piglalaoman na malangkaw na tubig baha sa tahaw kan forecast kan PAGASA na bako man na gayong makusog an bagyong Ulysses alagad nin huli ta mayo sindang contact number sa LGU San Jose, si partidaryos kan taga brgy. Dolo iyo an nag-contact sa FB ni Consejal Concina nganing ma-rescue an mga residentes na na-aalarma kan nagrararum na tubig baha.
Sa pig-post ni Maricel Payong ‘‘Nanawagan ako sa mga opisyales ng San Jose, kaipuhan mi an rescue huli ta sa naglalangkaw na an tubig baha sa Brgy. Dolo asin mas natatakot na sinda huli kan dai na makabalyo sa Brgy. Kinalasan na aagihan pasiring sa evacuation center ta naglalaog na an makusog na tubig hali sa sapa’’.
Pig-osipon pa kan consejal an pig-post ni Maricel Payong pinag tagged saiya kan duwang friends niya sa FB na sinda Margie Parone Curba kan Cavite asin Jonna Villete kan Parañaque City.
An mensaje ni Margie Parone Curba kan Cavite asin Jonna Villete kaipuhan an tabang kan saindang mga partidaryo na madali nang ma trap sa baha.
Nakua an atensyon ko kan sakuyang mabasa an post kan duwang residentes na nasa ibang lugar, sabi pa ni Concina.
Nin huli kan kaipuhan an emerhenciang aksyon sinda Concina, Consejal Bembot Dizon asin Jerold Pena, Chief of Staff ni 4th District Congressman Arnie Fuentebella nagkuang pribadong dump truck nganing ma-rescue tolos an mga nagkukurahaw nin ‘‘saklulo’’.
An mga sinapod sa tubig baha kan rescue team gamit an dakulang pesi nag-eedad nin tres anyos, cinco anyos hasta sa veinte anyos.
An rescue team ninda Concina, Dizon asin Pena, gabos rupit-rupit an saindang bado katuwang an mga volunteers saro-sarong sinapwat an mga residente nganing ilunad sa truck na mayong trapal.
Dai na nakabugtak nin trapal an importante nakaabot tolos an truck nganing mahakot an mga residente.
Sinda dinara sa residencia ni Pena nganing bulosan nin alang na bado asin digdi na muna pinadagos asin pinakakan nin perang aldaw.
Nagtarabang an sinambit na grupo sa pagtipon kan saindang sadiring mga gubing nganing itao sa mga barasa-basang evacuees.
Napag-araman na mayong ginibong force evacuation an LGU sa pagtubod na bakong delicado an bagyo na saindang pigbasehan an report kan PAGASA.
An grupo man kan Municipal Disaster Risk Reduction Management Office kan LGU San Jose igwa man suhay na ginigibong pag-rescue sa mga kaharongan na paliog na an tubig baha sa Brgy. Buklod.
Igwa na sindang gamit na baroto nin huli kan hararum na tubig baha.
Sa mga magkasuhay na rescue operation mayo man pig-report na nalamus sa nagrararum na tubig baha. An mga evacuees tinabangan man kan LGU nganing madara sa evacuation center. (DPAureus)