Ruta kan tricycle sa national road limitado sa sarong agihan

An lokal na gobierno kan Pili, Camarines Sur estricto nang na-iimplementar an one way kan viaje kan mga pampasajerong tricycle sa national road.

Binabawal sa national road kan Land Transportation Office (LTO) an tricycle alagad nganing maging legal an saindang viaje nagpasar nin ordinansa an Sangguniang Bayan kan LGU nganing tugotan sinda asin sa ngunian iyo na an pig-iimplementar kan Public Safety Office asin kan Municipal Police Station.

Ini an mga pahayag ni Consejal Narcel Lopez kan Sangguniang Bayan alagad sa saindang ordinansa dapat one way an dalagan kan mga tricycle kun haling Ciudad nin Naga pasiring sa centro kan banwaan maliko sa barangay Santiago, pasiring sa San Vicente asin San Isidro.

Kun susunodon an direktiva kan Department of Interior and Local Government (DILG) sa road clearing operations dapat mayong nagdadalagan nin tricycle sa national road alagad tutugotan sana kun igwang ordinansa an LGU.

Kadakle kan mga LGUs haloy nang pinapabuelo an viaje kan mga tricycle sa national road apesar na pigbabawal alagad sa patanid kan DILG sa road clearing operations, napiritan na magpasar nin kanya-kanyang ordinansa.

An DILG liwat nag-anuncio na saindang liliboton an mga national road maging municipal road na dapat sunodon kan LGUs na dai tinutugotan an ano man na ilegal na estractura sa road right of way kabale na an sidewalk.

Sa kaparejong entrevista kan BM sa consejal saiyang pigbuyagyag na dati siyang chairman kan mga komite kan Transportation, Agriculture, Infrastructure, Social Service asin Games and Amusement alagad kan saiyang suportaran an liderato ni Alcalde Tomas Bongalonta hinuban kan mga committee chairmanship kan mayoriang miembros kan Sangguniang Bayan.

Sinabi pa kan consejal dawa hinalian siya nin mga committee chairmanship alagad padagos an saiyang trabajo bilang lehislador.