25 units kan facilidad sa Covid-19 pinasuble kan DPWH
Nagtatabang na an Department of Public Works and Highway (DPWH) sa Bicol sa kakulangan nin mga Covid wards sa mga hospital sa Kabikolan asin igwa nang total na 25 units na mga pinasuble nin container vans asin ini igwa nin 500 gabos na bed capacity.
Kabale sa mga hospital na nadagdagan kan mga facilidad sa Covid-19 iyo an Bicol Medical (BMC) sa Ciudad nin Naga, Bicol Regional Training and Teaching Hospital (BRTTH) sa Daraga, Albay, mga lokal na gobierno kan municipalidades kan Daraga, Oas asin Manito gabos sa provincia nin Albay asin Ciudad nin Legazpi an natawan nin temporaryong pagpa-gamit kan mga facilidad sa paagi nin Memorandum of Agreement (MOA) sa DPWH.
Si DPWH Regional Director Virgilio Eduarte, nagpahayag na an saindang binarakal na vans ginagamit na temporaryong estaran kan saindang personajes nganing regular na mag-monitor sa pig-iimplementar na proyekto sa infrastraktura.
Katuyohan kaini nganing an saindang mga field personnel magkaigwa nin superbisyon sa mga nagpapadagos na proyekto kan kontratista nganing macierto an calidad asin matapos sa tamang oras, sabi pa ni Eduarte.
Sinda DPWH Regional Director Virgilio Eduarte (sa too) asin chief Administrative Officer Dr. Maria Teodora Losantas sa saindang inspeksyon sa bagong nag-abot na container vans. (DPWH 5)
An cada unit kan container vans na saindang pig-instelar kumpleto nin furniture, mini kitchen, comfort room, generator set asin mga air condition unit.
Nagpasalamat man an DPWH Bicol ki Sekretaryo Mark Villar na ipagamit muna an vans sa pangangaipo kan hospital asin LGUs.
Enot kaini, an DPWH 2nd District Engineering Office sa Albay, pig-turned over an modified standard 1-storey health facility sa laog kan Ibalong Centrum for Recreation sa lokal na gobierno kan Legazpi.
An tabang kan DPWH simbag sa pagkulang-kulang na nin Covid wards sa nagkaperang hospital sa Bicol sa tahaw kan padagos na paglangkaw kan caso sa Covid-19 base sa datus kan Departmen of Health.
An LGUS nagbukas na nin dugang na mga quarantine facilities nganing mahipnoan an problema kan mga hospital sa Covid wards. (DPAureus)