3 escuelas publica andam na sa face-to-face classes

Ciudad nin Naga --- Tolong mga elementary school na escuelas publica sa ciudad na ini pigrecomendar sa central office kan Department of Education (DepEd) nganing preparado an Naga ano man na oras magpaluwas nin directiva si Secretary Leonor Briones na puede nang punan an limitadong face-to-face classes.

Sinabi ni City School Division Superintendent Manny De Guzman an mga escuelahan kinababalehan kan elementary schools sa upper barangay Panicuason asin San Isidro na parejong zero sa caso sa coronavirus disease asin an Naga Central School II sa barangay Peñafrancia.

An recomendasyon kan DepEd Naga kasunod kan pinadarang checklist kan saindang opisina central kan mga escuelahan na dapat isumiter kan mga DepEd official na calificado sa limtadong face-to-face classes.

Kun marealsar an klase mga duwa hasta sa tolong aldaw cada semana alagad magdedefende sa ipapaluwas na memorandum kan DepEd national, sabi pa ni De Guzman.

Si Secretary Briones iyo an awtorisado na magrecomendar sa Malacañan kun nuarin iimplementar an face-to-face classes alagad sa ngunian dai pang asegurasyon sa tahaw kan padagos na paglangkaw kan Covid-19 cases.

An Sangguniang Panlungsod kan Ciudad nin Naga nagpasar na nin resolusyon na nagpapabor sa recomendasyon kan DepEd na magkaigwa na digdi kan pilot face-to-face classes alagad sa mga lugar na zero sa Covid-19 case.

Sa maabot na Hulyo 10, 2021 iyo an ultimong aldaw sa klase sa escuelas publica para sa school year 2020-2021.

Alagad an DepEd Naga maghahalat kan ipapaluwas na memorandum kun anong bulan an burokasan nin klase para sa school year 2021-2022 mantang sainda nang pig-aandaman.

An early registration sa elementary asin high school nagpuon na kan Marso 26 asin matapos sa Abril 30, 2021.

Si mga dati nang naka-enroll asin nag-eescuela ngunian na school year dai na kabale huli ta yaon na sinda sa listahan alagad an kaayon sana sa early registration iyo an kindergarten, grade 1 to 7 asin grade eleven.

Mayong nangyayaring face-to-face envez online an pagpalista sa mga public school. (DPAureus)