90% kan mga jeepney sa CSur rehistrado na sa CDA

Iginilid na kan tradisyunal na jeepney sa Camarines Sur an posibleng pagsabay sa sarong semana ‘‘tigil-pasada vs jeepney phase out’’ poon sa Marso 6 sa Metro Manila sa tahaw kan kumfirmasyon na maabot na sa nobenta por ciento sa sainda an nakaporma na asin rehistrado na bilang cooperativa sa Cooperative Development Authority (CDA).

Sinabi ni Joel Pillogo kan CONDOR-PISTON sa Bicol bako lang sa Camarines Sur maging sa rehiyon Bicol an dakul na an rehistrado bilang cooperativa kasunod kan patanid kan Land Transportation Franchising and Regulatory Board (LTFRB) na si dai nagkumbenter sa cooperativa na tradisyunal jeep sagcod nalang sa Hunyo 30, 2023 nganing maseguro na padagos an saindang provisional authority to operate.

An patanid kan LTFRB na dagos nang iimplementar ninda an phase-out sa mga pampasajerong tradisyunal na jeepney huli kan labi nang apat na taon an saindang extension alagad kun dagos pang masinutil babawion na an saindang franquicia nganing dai na makakayod.

An estrictong implementasyon sa modernization program kan ahencia panahon pa ni dating Presidente Rodrigo Duterte nagkapera nang veces nagpatanid asin ngunian tapos an mga tinaong plaso, sabi pa.

Katuyohan kan pagbilog nin cooperativa nganing makabakal an mga operator kan mga modern jeep na nagcacantidad dos milyones peso cada sarong unit alagad uutangon sa paagi kan financial institutions.

Dawa ngani kontra an sektor nin transporte huli ta malinaw an mandato kan gobierno na sa diktador na. Haen na si diretso kan lambang operator na makadesisyon kun ano an gagamiton na jeepney para sa saindang hanapbuhay, segun pa ki Pillogo.

Segun sa ahencia, solamente an mga operator na nakaorganisar nin cooperativa na iisyuhan nin Certificate of Public Conveyance asin libredo na sinda sa tinaong plaso sa Hunyo 30.

Sinabi pa ni Pillogo na dai kakayahon kan indibiduwal na operator na magsadiring cooperativa envez dapat magbilog nin grupo.

Alagad piglinaw pa kan LTFRB na igwa pang hastang sa Deciembre 30, 2023 an mga operator na nagpoon nang mag-proceso sa dokumentos para sa consolidation process.

An naheheling kan mga operator iyo an estrictong pigmamando sa memorandum na dapat igwang mahiwas na lote na gagamiton na garaje nin mga jeepney. (dpa)

Tradisyunal na jeepney sa ciudad nin Naga na rehistrado sa CDA dai masabay sa juelga sa Metro Manila.