92 na pamilyang Nagueño nagresibe nin certificate of lot allocation sa syudad

Formal nang pigdistrubwer kan lokal na gobyerno kan Ciudad nin Naga sa pamamayo ni Alkalde Nelson Legacion an 92 gabos na certificate of lot alocations para sa lote na yaun sa Saint Isidore village na nakabase sa Zone 7, San Isidro, Naga City laog kan 1.5 hectare na lote kan ciudad.

Sa pahayag ni Engr Rolly Campillos, pamayo kan Housing, Settlement and Development Office, parte ini kan socialized housing kan Naga City Government sa lindong kan Kaantabay sa Kauswagan Program kun saen natawan an mga qualified beneficiaries nin lot alocations para magka-igwa nin lote asin harung para sa saindang disenteng istaran.

Segun ki Engr Campillos, kadakli sa mga beneficiaries inabot na nin pirang taon an pighalat alagad ngonian sa panahon ni Mayor Legacion, natawan na sinda kan lot allocations lalo idtong mga kaipuhan na marelocate huli ta naapektaran kan road widening sa area kan Mabulo asin Tabuco bridge, dangan inasigurar ni Engr Campillos na igwa pang masurunod komo dakul talaga an nag-aapply sa nasambit na programa kan ciudad.

Katuwang man kan lokal na gobyerno an Saint Jude Thadeus parish sa pamamayo ni Fr Francis Tordilla sa pagtao nin pabahay sa mga qualified beneficiaries.