top of page

Ayuda sa mga paraoma na apektado kanbagyong ‘‘Paeng’’ hinahalat pa sa DA central

An opisina rehiyonal kan Department of Agriculture (DA) sa Bicol nagsumiter na kan saindang rehabilitation plan sa central office nganing matabangan an ribo-ribong mga paraoma na apektado kan nakaaging bagyong Paeng sa rehiyon.


An saindang piglalaoman na mga ayuda siring kan banhi sa paroy, mais, gulayan asin iba pa, oras na ibagsak na an suplay ipapadara kan DA sa mga Municipal Agriculturist Office nganing idistribuer sa mga paraoma, sabi ni Lovella Guarin, opisyal na parataram kan DA Bicol.


Sa natipon na total na danyos kan Office of Civil Defense asin Department of Agriculture maabot sa P1.1 bilyones na an dakulang destroso kan kalamidad iyo an sektor nin agricultura sa mga provincia kan Camarines Sur, Masbate, Sorsogon asin Albay.


Hinahalat pa kan DA Bicol an dugang na ayuda nin tig-a P5,000 na Rice Farmers Financial Assistance (RFFA) sa mga paraoma nin paroy para sa iba pang provincia kan Bicol na dai pa inaabot kan sinambit na cash assistance.


An mga calificadong paraoma digdi iyo si rehistrado sa Registry System for Basic Sectors in Agriculture na dapat igwang duwang hektarya pig-ooma.


Kabali pa sa tinatawan cash assistance kan ahencia iyo an high value crops asin nag-aataman nin mga hayop. Nagtatao pa nin live animals, bulong asin biologist para sa mga hayop arog kan orig, manok, baka, damulag asin kanding.


Labi na sa P648-M an enot nang naitaong cash assistance para sa RFFA, sabi pa kan DA.


An fondo hali sa P10-bilyon na Rice Competitiveness Enhancement fund (RCEF) na natipon taon-taon poon na iimplementar kan nagtalikod na administrasyon hali sa Rice Tarrification Law o mas midbid sa Acta Repulica 11203 na pigfirmahan ni Presidente Duterte kan Febrero 14, 2019.


Afuera sa agricultura igwa man danyos sa infrastraktura alagad an report hali sa Department of Public Works and Highways (DPWH) Bicol. (dpa)

bottom of page