BAKONG PANLALAMANG SA POLITIKA: Special Cafgu kan CSur Capitol katuwang kan PA vs insurhencia

Pili, Camarines Sur --- Bakong personal na kagustohan kan gobernador nganing gamiton sa panahon nin eleksyon sagcod na gibohon na personal bodyguard kan gobernador asin arin man na opisyal kan Capitolio Provincial an mumuknaon na ‘‘Special Citizen Armed Forces Geographical Unit (Cafgu)’’ envez tabang sa fuersa kan Philippine Army (PA) sa campanya laban sa insurhencia.


Si Vocal Romulo Hernandez kan segundo distrito kan Camarines Sur naglinaw kan isyu sa pagcrear nin Special Cafgu sa tahaw kan pagduda kan ibang politico na posibleng gamiton na panlalamang sa maabot na eleksyon kan mga Villafuerte.


Sa entrevista kan Bicol Mail sa paagi nin telepono ki Vocal Hernandez sinabi kaini na si Major General Henry Robinson, Commanding General kan 9th Infantry Division kan Philippine Army na may base sa Camp Elias Angeles, Pili, Camarines Sur iyo an naghagad sa Capitolio Provincial sa paagi nin ordinansa magcrear nin Special Cafgu na componido nin 120 miembros alagad an fondo maghahali na sa caja kan provincial.

Kumunista ng Pilipinas sa Bikol misyon kan soldados kan gobierno, Cafgu asin kan bagong bibilogon na Special Cafgu nganing taposon an insurhencia sa CamSur.


Alagad sinda magiging katuwang kan militar asin regular na miembros kan Cafgu sa paglaban sa campanya sa insurhencia na an superbisyon asin kontrol yaon sa 9th Infantry Division bako sa Capitolio Provincial.


Si Bise Gobernador Imelda Papin nagsabi na aprubado na an ordinansa nganing magpirmahan sa memorandum of agreement sinda Gobernador Migz Villafuerte, Defense Secretary Delfin Lorenzana asin Major General Henry Robinson sa lado kan Philippine Army.


Saiya pang dinagdag na bakong pang-Capitolio sinda envez an 9th ID iyo na an may superbisyon sa special Cafgu kun sain sinda dapat madestino.


Huli kaini, imposibleng maging private armies an bibilogon na special Cafgu.


Pigcuestion ni Vocal Awel Llaguno sa junta provincial an pagcrear kan Special Cafgu na dapat maaraman kun saen talaga sinda madedestino mantang yaon naman an establisimiento militar asin Cafgu sa Camarines Sur na nakawarak na sa limang distrito na iyo an may responsabilidad sa paglaban sa insurhencia.


Dagdag gastos kan provincia mantang an ‘‘subsistence allowance’’ hale sa bulsa kan Capitolio Provincial.


An limang miembros kan oposisyon sa junta provincial na sinda Vocal Awel Llaguno, Trexie Clemente-Maquiling, Nelson Julia, Jayjay Pilapil asin Ruperto Alfelor gabos nagcontra sa pag-aprubar sa ordinansa. (dpa)