BHW TAKOT BAKUNAHAN SA COVID-19: Survey sa pagpabakuna ginigibo sa manga brgy
Nagpapadagos pa an survey sa mga barangay kan Ciudad nin Naga nganing aramon sa mga residentes kun sinda pabor na magpatudok o dai sa bakuna contra sa coronavirus disease (Covid-19), alagad saro sa mga barangay mayoria nagsabi na natatakot o nagduduwa-duwa, kabale an Barangay Health Workers asin nagkapera sana an nagpahayag nin pagpabor.
Si Liga nang Barangay President asin ex-officio member kan Sangguniang Panlungsod Antonio ‘Dodith’ Beltran nagpahayag sa entrevista kan Bicol Mail sa paagi nin telepono na nag-miting na sinda sa Liga na saro sa natukar iyo an pagkundukta nin survey kan mga Barangay Health Workers (BHW) sa 27 barangay asin nagtao sinda nin plaso hasta sa Febrero 28 nganing an resulta kan survey isumiter ki Dr. Butch Borja, City Health Officer kan City Hall.
Igwang survey form na iyo an sisimbagan kan mga rehistradong votantes asin senior citizens na iyo an bitbit kan BHW nganing fill-up, alagad si Beltran dai paman nagtao kan inisyal na resulta mantang isusumiter gabos sa CHO.
Alagad nagtutubod an Liga president na maabot an 90 por ciento sa survey na pabor magpatudok bakuna.
Sinabi pa ni Beltran sa saindang urulay an enot na dapat magpa-arog sa publico na magpabakuna, iyo sinda Arsobispo Rolando Tria Tirona, Alcalde Nelson Legacion asin pamayo kan Liga.
Sa entrevista kan media ki Lorna Regatchuelo, jefe kan BHW sa barangay San Francisco saiyang kinumfirmar na mayoria sa saindang mga hinapot na residentes nagsabi na habong magpa-bakuna huli ta natatakot base sa mga nagluluwas na report sa TV sa negatibong epekto kan bakuna.
An iba ‘‘undecided’’ asin dikit sana an dai natatakot nganing magpabakuna, sabi pa kan BHW.
An BHW kabale sa listahan na dapat tawan nin prioridad na mabakunahan alagad igwang mga natatakot.
Maging si Regatchuelo nagsabi na natatakot siyang magpabakuna maging an iba niyang pag-iriba sa BHW.
Sa suhay man na mga pahayag ni San Francisco Punong Barangay Efren Nepumoceno, sinabi kaini na ‘‘nagduduwa-duwa siya’’ na magpabakuna alagad kun mangengenotan si Alcalde Nelson Legacion puede siyang magpatudok bakuna.
Nakatalaan na mag-abot sa Ciudad nin Naga sa huring semana kan Marso 2021 an suplay kan AstraZeneca na iyo an itutudok na bakuna sa mga residentes kan ciudad.
An plano kan City Hall dapat gabos na mga residentes kan ciudad mabakunahan, alagad prioridad man giraray an mga health workers, senior citizens asin miembros kan PNP.
Cantidad P50 milyon an pigtagama kan ciudad nganing ibakal suplay kan Covid 19 vaccine. (dpa)