Calabanga, CamSur binugtak na sa GCQ

An banwaan na ini iyo an enot na banwaan sa tercer distrito kan provincia na ipasa-irarum sa General Community Quarantine (GCQ) kasunod kan recomendasyon kan Department of Health (DOH) asin kan Bicol inter-agency task force sa tahaw kan padagos na paglangkaw kan caso sa coronavirus disease (Covid-19).

Si Alcalde Eduardo Severo nagpahayag na sa inbestigasyon kan local IATF an saro sa causa kan marikas na paglangkaw kan virus sa saindang banwaan nin huli kan local transmission.

Dai man ninda masahot sa mga returning residence mantang kontrolado ninda an mga nag-aarabot huli ta an Del Gallego border nasasara na an mapuroli sa saindang banwaan na tolos man dinadara sa isolation center si mga igwa nang sintomas asin kun positivo sa antigen test pigdederetso na sa Provincial Health Center sa Bula, Camarines Sur.

Sagcod na yaon pa sinda sa GCQ, sinabi pa kan jefe ejecutivo nagbugtak na sinda kan Oplan Sita sa palibot kan banwaan; igwa nang mga ginigibong random checkpoint an PNP; dai tutugotan an mga bakong residente na maglaog sa recreational facilities asin exclusibo sana sa Calabangueno; bawal na magluwas sa saindang harong an mga nag-eedad nin 15 hasta 65 anyos asin may helang asin nag-implementar nin curfew hours.

An iba pang mga banwaan alagad pigrecomendar man sa ‘‘GCQ with a moderate level of risk’’ kan DOH sa paagi kan Regional Epidemiology and Surveillance Unit (RESU) iyo an mga minasunod, Bato; Bula; Gainza; Garchitorena; Lupi; Magarao; Milaor; Minalabac; Nabua; Pili; Ragay; Tigaon asin an ciudades kan Naga asin Iriga.

An recomendasyon nganing mapugolan an padagos na paglangkaw kan virus infection.

An DOH tracker nagpapahayag an Camarines Sur nakalista na nin maabot sa 2,700 na caso na considerado nang nasa moderate risk, na dapat na isairarum sa GCQ.