Dorogista litag sa drug operation, P3.4M na shabu nabawi kan awtoridad

Litag sa buy bust operation kan pinagsarong fuersa kan Regional Police Drug Enforcement Unit 5, Naga City Police Office (NCPO) asin Philippine Drug Enforcement Agency (PDEA) an sarong treinta y siete anyos na lalaki na taga Housing II, Brgy. Monserrat, Magarao, Camarines Sur asin haloy nang ‘‘wanted’’ sa ilegal na droga.

Sa operasyon alas 12:40 nin hapon, Hulyo 16, 2023 kan mga awtoridad nadakop an suspek na si Quincy Nieto mantang sa enot na transaksyon sa barakalan nin cincuenta gramos sa cantidad na P130,000 nagkasundo sa presyo.

Alagad an suplay nin dugang na shabu ginibo sa abandonadong harong sa Villa Obiedo Subdivision, Barangay Cararayan, Ciudad nin Naga. Digdi nagralaogan an mga awtoridad sagcod nakabawi nin P3.4 milyon na cantidad nin shabu na dagos nang niramalan bitbit sa NCPO dagos nang sinangatan nin caso sa pagbalga kan Acta Republica 9165 o mas midbid sa Comprehensive Drugs Act of 2002.

Pinagtutubodan na si iba pang suplay nin droga kan suspek naibariwas na sa ciudad asin pagtaraid na banwaan.

Sa Sangguniang Panlungsod kan Ciudad nin Naga, si dating heneral asin ngunian Consejal Omar Buenafe nagpahayag nin pagsaludo sa padagos na operasyon kan PNP asin PDEA laban sa ilegal na actividad sa laog kan ciudad.

Saiyang inomaw an liderato ni City Director Col. Nelson Pacalso kan NCPO mantang dai nag-uuntok sa paglapag kan mga envuelto sa droga sa saiyang area of responsibility.