DPWH mapatukdok nin 714 classrooms sa Bicol

Iguang bagong 714 classrooms an ipapatukdok sa Bicol kan Department of Public Works and Highways (DPWH) para sa school year 2024 nganing makadagdag sa pagkulang-kulang nin classrooms kan Department of Education (DepEd).

Si Regional Director Gilbert Sadsad nagpahayag ini an saindang nakuang report sa DPWH Bicol mantang enot nang sinabi ni Director Virgilio Eduarte sa press conference na maabot sa 300 na mga escuelahan sa rehiyon an saindang pighihirahay para magamit ngunian na school year.

Saiya pang pigbuyagyag mantang kan nakaaging taon igua nang plano, alagad nasa 52 sa 333 na planong classrooms para sa SY 2023 an nakumpleto, mientras na 26 sa 40 classrooms an dapat natapos kan SY 2022.

Admitido kan DepEd na parating kaipuhan an dugang na mga classrooms cada taon sa ibong kan padagos na pagdakul kan populasyon nin estudiantes.

Alagad pigseguro kan ahencia na preparado na sindang akoon an maabot sa 1,733,251 enrollees, sa treceng divisions sa rehiyon Bicol.

Cada school year saindang pig-aandaman an pagburukasan nin klase na dati nang ginigibo kan mga pamayo nin escuelahan.

Mientras tanto, liwat nagpagirumdum an DepEd na estrictong pinapasunod an ‘‘No Collection Policy’’ ngunian na panahon nin enrollment poon sa elementarya, asin segundarya. An enrollment nagsikad kan Hulyo 3 hasta Hulyo 26 para sa SY 2024-25.

An pulicia base sa DepEd Order Number 12 serye kan 2008 na prohibidong mag-imponer nin koleksyon an arin man na opisyal kan escuelahan urog na sa panahon kan enrollment.