Dugang na Covid-19 wards pig-aandaman na kan BMC

Igwa nang programa an Bicol Medical Center (BMC) para sa expansion plan kan hospital bed asin ICU sa tahaw kan nagkukuno-kuno na nin mga pasyente an saindang Covid-19 wards.


An BMC igwang mga espasyo sa dakulang mga edificio an saindang problema iyo an fondo para sa dugang na nurses asin iba pang mga staff alagad saro pa sa problema dai nagbabayad nin milyones pesos an Philhealth na puedeng isueldo sa dugang na mga staff.


Sa press conference kan mga opisyales kan hospital na sinda Dr. Joey Rañola, Mary Jane Uy asin Natalie Lazaro an saindang pigtawan nin duon laen kan problema sa full capacity sa Covid wards iyo an pangapudan sa publico na magpabakuna laban sa virus mantang ini libre nganing dai na magparalangkaw an caso.


Pasalamat sinda sa mga aplicanteng nurses alagad admitido kan manijamiento na kulang sinda nin personajes mantang an iba nagsasayuma na magpadestino sa Covid ward.


Nagpaluwas na nin aviso sa publico an BMC na an saindang isolation wards sa mga pasyente sa Covid-19 nasa ‘‘full capacity’’ na.


Huli kaini, puon kan Domingo, Hunyo 6 an hospital lilimitaran na mag ako nin Covid-19 patients an mga severe o critical na kondisyon sana.


Sagcod nalang limang aldaw sa hospital an pasyente sa virus asin tutugotan nang paluwason nganing i-turn over sa LGU nganing ilaog sa saindang quarantine facility.


Hinagad na kan BMC sa mga LGUs na dugangan an saindang quarantine facilities para sa saindang konstituentes na may mild symptoms o asymptomatic. (dpa)