top of page

Epekto kan El Niño sa paraoma amay pig-andaman kan DA Bicol

An Department of Agriculture (DA) Bicol nagpahayag na enot na cuarto ngunian na taon sainda nang pig-andam an plano asin programa sa mga dapat iimplementar sa epekto sa paraoma huli kan El Niño phenomenon.


Si Lovella Guarin, regional information officer kan DA nagsabi kasunod kan pinaluwas na anunsyo kan Philippine Atmospheric, Geophysical and Astronomical Services Administration (PAGASA) alert maninigo lang an preparasyon asin programa sa mamateon na panahon nin tig-alang.


Kabale sa saindang aksyon iyo an amay na pagdistribuer nin makinarya sa patubig siring kan pumping irrigation system for open sources (PISOS) sa nagkaperang paraoma sa Camarines Sur, Albay asin Masbate.


An ginibong panao kan ahencia nin libreng hybrid rice seeds, abuno sa nagtatanum nin paroy asin mais, semilya sa gulayon asin iba pang pangangaipo ngunian na panahon nin El Niño.


Sinabi pa ni Guarin an saindang ayuda nganin amay na parte ngunian na taon asin igwa pang nangyayaring mga pag-uran makahabol pa sa pagtanum an paraoma.


An PAGASA alert kasunod kan makuring mamateon na init nin panahon sa mga bulan nin Hulyo, Agosto asin Septiembre na malaog pa sa sunod na taon 2024.


An sinambit na ahencia nagpatanid pa bako lang ngunian na taon envez sa 2024 magkakagaratak an kaomahan mantang puedeng dai na kayahon kan irrigation system.


Sinabi pa kan PAGASA nagkakaigwa nin El Niño cada duwa hasta sa pitong taon alagad ngunian na taon iyo an mas malalang epekto sa lado nin paraoma na mababa an produksyon nin bagas maging kan gugulayon asin sa mga ataman nin hayop.


Sa lado kan mga lokal na gobierno nag-aandam na sa pagbilog nin task force El Niño sa epekto kan weather phenomenon sa rehiyon cinco.


Manginginotan sa task force iyo an Municipal Disaster Risk Reduction Management Council kan LGUs.


Sa ngunian minamate na an El Niño mala ngani an DepEd - Bicol nagpapasunod na kan modular mode of learning sa estudiantes sa elementarya asin segundarya.


Naglalangkaw na an temperatura asin segun sa PAGASA puedeng magtama sa heat indexes hale sa 42 hasta 51 degrees Celsius. (dpa)

Comments


bottom of page