Front liners prioridad sa pagoda ni Ina sa fluvial procession

Tatawan nin prioridad an mga front liner nganing makalunad sa pagoda sa gigibohon na fluvial procession sa kapiestahan ni Nuestra Señora de Peñafrancia sa Septiembre 17 alagad limitado na an pasajeros sa 150 kabale digdi an 95 mga kapadian asin iginilid na an miembros kan media na taon-taon kabale para sa saindang coverage kan lambang estasyones nin radyo asin television.

Ini an desisyon kan Archdiocese of Caceres asin kan City Hall sa tahaw kan dai pa nahahale an homa kan Covid-19 alagad an pagbaba kan numero kan pasajeros sa pagoda hale sa dating inaabot sa 200 asin ngunian na 2022 Peñafrancia fiesta 150 pasajeros iyo an posibleng gibohon sa masunod taon na actividades ki Ina, sabi ni Padre Pablo Carpio kan Peñafrancia Basilica Minore.

An puedeng gibohon kan miembros kan media maglunad sa baroto o ano paman na klasing sasakyan sa salog.

Dai idadagos si planong mobile procession asin ibabalik si dating tradisyonal na foot procession mantang dai ini nangyari kan nakaaging duwang taon huli kan pandemya.

An mga voyadores dapat magpalista ngona sa simbahan huli ta estrictong ipapasunod na kaipuhan sinda natudokan na nin booster vaccination.

Maging si mga devoto ni Ina asin El Divino Rostro na maparticipar sa duwang prusesyon dapat bakunado na nin booster shot.

An Caceres asin lokal na gobierno padagos kan saindang pagtarabangan nganing alokon an publico na magpabakuna na nin booster shot.

Sa lado kan paz y orden an Naga City Police Office susuportaran kan augmentation force kan PNP hale sa Camp Semion Ola asin mga soldados kan 9th Infantry Division kan Philippine Army nganing magmantenir kan dalagan kan prusesyon asin sa bilog na mga actividades civico asin simbahan. (dpa)