Gob. Luigi amay binandera an red alert status huli kan mga paguran

Pili, Camarines Sur --- Amay pig-bandera ni Gobernador Luigi Villafuerte sa Red Alert Status an provincia sa tahaw kan makusog na mga pagbulos nin uran nganing maka-andam sa pre-empted evacuation nin mga residentes na nag-eerok sa mga kababan na lugar.

An alert status kan gobernador kasunod kan binareta kan PAGASA kan ‘‘shear line’’ na haros enterong provincia nin Camarines Sur apektado nin mahiwas na tolong aldaw na mga paguran asin tubig baha.

An direktiva kan jefe ejecutivo para sa gabos na mga alcalde, MDRRMC chairpersons, opisyales de barangay, asin an PDRRC agencies sa tolos pig-aktibar an saindang mga Emergency Operation Center asin dapat regular an pag-monitor kan arin man na peligroso sa paghuros nin daga asin tubig baha.

Sa report kan EDMERO asin PIA Camarines Sur an na-apektaran kan baha huli kan perang aldaw na pagbagonas nin uran kinababalihan kan mga kababan na lugar sa Lagonoy, San Jose, Tinambac, Bombon, Calabanga asin Magarao na amay nagsangkay si tubig baha.

Nagsupay man si tubig sa spillway, an San Pedro-Poblacion asin Pobalacion pasiring sa Barera Jr. sa Lupi asin barangay Tomagodtod spillways pasiring sa Sitio Ilihan sa Calabanga alagad naagihan man giraray nin vehiculo. An spillways sa Brgy. Napawon asin Camuning sa Calabanga nagkaigwa man nin halangkaw na mga pagbaha.

Sa report pa kan PDRRMC nagkaigwa man nin paghuros nin daga sa may Lagonoy-Presentacion road, San Sebastian, Lagonoy section, na sarong agihan sana an tinutogotan.

Mantang sa Sitio Caguiscan, brgy. Loho road sa Lagonoy dai naagihan nin vehiculo.

An iba pang apektadong iyo an mga kababan na mga barangay kan Ragay, Lupi, Sipocot, Pasacao, San Fernando, Milaor, Gainza, Camaligan asin Minalabac.

Maabot man sa tres mil na persona an mga evacuees sa provincia na tolos man tinabangan nin relief goods hali sa LGUs asin DSWD.