HERTF vs pagbuelta sa viaje kan bus Naga-Mla

Tinutugotan na kan Land Transportation Franchising and Regulatory Board (LTFRB) an pagbuelta kan viaje sa mga pampasajerong bus sa rutang Ciudad nin Naga-Manila, alagad dai pinaboran kan Health Emergency Response Task Force (HERTF) kan City Hall.


Ini an piglinaw ni Nonoy Reforsado, Operation Manager kan Bicol Central Station (BCS) sa tahaw kan mga kahapotan kan pasajeros kun tano ta mayo pang viaje an bus sa Ciudad nin Naga mantang sa Ciudad nin Tabaco pasiring sa Manila nagpapadagos na.


An HERTF pinamamayohan ni City Health Officer Dr. Vito ‘‘Butch’’ Borja dai nag-uyon na ipadagos na an viaje kan Naga-Manila mantang an Naga haros aroaldaw iyo an may halangkaw na caso kan coronavirus disease sa Camarines Sur base sa mga pinapaluwas na datus kan Department of Health (DOH) Bicol.


An pigtawan nin halaga para sa proteksyon kan salud kan mga taga Naga, afuera kaini dai pa maiibitaran si pasajeros na haling Manila posibleng magbitbit pa nin virus, sabi pa ni Reforsado.


Dawa malugi an operasyon kan terminal pinagmarhay kan City Hall na igilid na muna an viaje kan Naga-Manila bus.


An national IATF estrictong nagpapasunod na dapat an malunad sa bus igwang negativong resulta kan RT-PCR test na dagdag gastos kan pasajeros.


Sa ngunian limitado an naglalaog na mga bus sa BCS na kabale digdi an rutang Ciudad nin Legazpi asin Daet, Camarines Norte asin si mga nagruruta sa laog kan provincia nin Camarines Sur.


An viaje kan Tabaco City pasiring Manila prohibido kan LTFRB na mag-pick up nin pasajeros sa BCS maging sa iba pang pagtaraid na provincia.


An padagos na pendiente sa viaje kan mga pampasajerong bus, an apektado iyo an negosyo kan mga bus operator asin mga tsuper na sarong taon nang mayong kayod. (DPA)