HULI SA PANDEMYA: Nagkaperang negosyo sa Goa, CSur pinasuspinde

Paralisado an dalagan kan nagkaperang mga negosyo sa Goa, Camarines Sur kasunod kan pinaluwas na indefinite suspension sa sainda kan lokal na gobierno kabale an bulangan huli kan pandemya.


Si Alcalde Marcel Pan nagpaluwas nin orden ehecutivo na sinuspende an mga resto bar, ano man na aling-alingan, videoke bar asin bulangan sa Brgy. San Benito.


Pigdududahan an saradit na negosyong ini na pigtitiriponan nin mga tawo na saro sa pueding dahilan kan local transmission kan Covid-19.


Dai naman nag-angal an apektadong mga negosyante mientras na pigtatawan nin proteksyon kan LGU na maibitaran an paglakop kan virus.


Isasakripisyo kan lokal na gobierno an saindang dikit na ingreso hale sa sinambit na establisimiento envez dapat protehiran an salud kan saindang namamanuan contra sa deadly virus.


Yaon na sa quarantine facility kan LGU an mga pasyente maging si mga person under monitoring (PUM).


An suspension huli kan paglangkaw kan caso sa coronavirus disease (Covid-19) alagad ibubuelta an saindang operasyon kun magkulpa na an virus sa saindang banwaan.


An municipalidad kan Goa iyo an centro de negosyo sa Partido area na dakul an mga nagdadarayong consumedores nganing digdi magsaod.


Mientrastanto sa Pamplona, Camarines Sur si Alcalde Ronaldo ‘Boy’ Franco nagpaluwas man nin infinite suspension sa operasyon kan saindang bulangan bako lang huli sa pandemya alagad nadiscobre na dai pa na renew kan saindang business permit.


Dai palang nahahaloy nakumfirmar kan Municipal Health Office kan LGU Pamplona na si nagkaperang nagpositivo sa Covid-19 sa saindang banwaan hale sa bulangan. (dpa)