Ilegal na STL sa Naga dai napapapundo kan NCPO

Dawa nag-atubang na sa sesyon regular kan Sangguniang Panlungsod si City Director Col. Nelson Pacalso kan Naga City Police Office alagad nagpapadagos pa an talamak na tarayaan sa Small Town Lottery (STL) apesar na mayong franquicia na pig-isyu an City Hall.

Igwang ibang tiendahan sa barangay na nagbugtak nin bulletin board na digdi maheheling an mga resulta sa tolong veces na bola kan STL aroaldaw.

Alagad sa entrevista kan Bicol Mail ki Consejal Salvador Del Castillo, sinabi kaini na tatawan ninda nin sarong bulan na plaso an NCPO nganing darakapon an mga envuelto sa ilegal na sugal sagcod na mawara na digdi an ilegal na actitividad.

Si Pacalso kan mag-atubang sa sesyon regular kan Sangguniang Panlungsod nagpangako na dawa igwa na sindang enot na 20 mga kuryador sa ilegal na STL nagkadarakop alagad ipapadagos ninda nganing magkadarakop asin mapuho na an ilegal na actividad sa ciudad.

Alagad sagcod sa ngunian talamak pa an kuryador sa STL jueteng sa mga barangay kan ciudad.

Kun mayong mangyari sa pigtalaan na plaso an SP mapanday nin rekomendasyon kontra sa city director, sabi pa.

Si Del Castillo, iyo an nagbuyagyag sa sesyon regular kan SP sa paagi kan privilege speech sa talamak na koleksyon kan STL/jueteng sa ciudad apesar na mayong permiso kan City Hall.

An Liga ng mga Barangay hinahagad na an suporta nganing makitabangan sa NCPO sa pagpuho kan sugal.

Si Punong Brgy. Pedro San Juan Jr. na kasabay naging bisita kan SP ni Col. Pacalso, nagkumfirmar kan mahiwas na operasyon kan STL sa mga barangay kan ciudad.

Sa lado kan Philippine Charity Sweepstakes Office sa Camarines Sur Branch Office, sinabi ni Provincial Manager Jobet Ramos na dai dapat magdanay an STL sa Ciudad nin Naga huli ta dai na ini kabali sa tinawan franquicia an operasyon kan sugal sa paagi kan Even Chance Gaming Corporation. (dpa)