Imahen ni Nuestra Senora de Peñafrancia malibot sa CSur

Malibot an imahen ni Nuestra Señora de Peñafrancia sa manlaen-laen na banwaan kan Camarines Sur nganing magsungko sa mga paroquia kan Archdiocese of Caceres poon sa premirong semana kan bulan nin Agosto 2022.


Si Padre Louie Occiano, director kan Caceres Commission on Caceres (CCCOM), nagpahayag an pagsungko ni Ina parte kan selebrasyon kan ika-312 taon na debosyon kan satong Ina, Nuestra Señora de Peñafrancia, asin ika-140 taon na debosyon ki Divino Rostro.


An actividades kan Divino Rostro sa Agosto 31 hasta Septiembre 9 asin sa imahen ni Nuestra Señora de Peñafrancia sa Septiembre 9 hasta 18, 2022.


Alagad kaipuhan sunodon kan mga deboto an Circular No. 0012 na pinaluwas kan Hunyo 8, 2022 kan Arsobispo na nagbabawal sa paghadok asin pagdota sa imahen sa gabos na oras.


Nagkaperang mga deboto ni Ina nagpahayag na saindang pig-aabangan an pagsungko ni Ina sa masunod na bulan nin Agosto nganing dai na sinda magpasiring sa Ciudad nin Naga mientras na piglalaoman suroksokan naman an mga tawo sa Peñafrancia fiesta.


Sa pig-aandaman na selebrasyon kan Festividad ni Ina, sa sinambit na circular sa gigibohon na Traslacion Procession, an mga imahen ni Ina asin kan Divino Rostro ilulunad sa vehiculo mantang sa fluvial procession ipapadagos man giraray alagad limitado an mga dapat maglunad.


Ipapasunod man giraray an pagbawal maghadok asin pagduta sa mga imahen. Duwang taon mayong actividades sa Festividad de Ina huli kan pandemya.


An iimplementar na mga limitasyon sa devotos ni Ina asin Divino Rostro sa tahaw kan dai pa nahahale an homa sa virus huli kan coronavirus disease (Covid).


An tema sa selebrasyon ngunian na taon iyo an ‘‘Mary accompanies us in our journey towards a synodal Church’’ (DPA)