Imbestigasyon sa suboot pan-aanab sa Siruma mapadagos - Fuentebella

Piglinaw ni Camarines Sur 4th District Rep. Arnie Fuentebella na mapadagos pa man guiraray an imbestigasyon kan kongreso sa land claim issue kan Wanderlust Land Development Corporation sa 1,014 hectares nin daga sa Barangay San Ramon asin Salvacion, Siruma parehong probinsya.

Enot nang pigtulod ni Fuentebella sa paagi kan saiyang privilege speech sa camara baja, kan Febrero 9, ngonian na taon an sarong congressional investigation kan committee on good government and public accountability sa isyu.

Lunes na banggui, pigheras ni Fuentebella an pagbisita kan nagkapirang agrarian reform beneficiaries (ARB) sa lugar kaiba sinda Kapitan Bavel Arevalo kan Barangay San Ramon, nasambit na banwaan; Siruma Mayor Karen Polinga, KiudKIad Campsite owner Randall Dagooc asin mga abogado sa oficina ni Apayao Lone District Rep. Eleanor Bulut-Begtang, chairman kan House committee on agrarian reform para sa sarong halipot na pagtiripon dapit sa isyu.

Afuersa pa sa pakikiolay ki Begtang, nagin matrayumpo man an pakikiolay kan mga apektado sa isyu ki Anakbayan Party-list Rep. Chel Diokno, Kabataan Party-list Rep. Renee Co asin Mamamayang Liberal Party-list Rep. Leila de Lima na susug pa ki Fuentebella, ngaralas sa titulo kan korporasyon sa kadagaan na may 434 hectares nin certificate of land ownership award (CLOA) holders, 300 timberland magin an 140 hectares na may bodies of water.

Kasumpay kaini, nakatalaan na magbisita liwat si Fuentebella sa Sabado, Hunyo 6 para sa gigibuhong briefing sa mga residenteng apektado kan land claim kaiba an Register of Deeds, Department of Agrarian Reform, Department of Environment and Natural Resources, National Bureau of Investigation asin iba pang ahensyas de gobyerno.

Mientrastanto, nagpasalamat si Dagooc ki Fuentebella, Polinga asin sa mga party-list representatives dahil sa saindang pagdangog sa agrangay hale sa harayong banwaan kan Partido area.

Nagpoon an durulak entre kan kumpanya asin mga residents, paraoma asin parasira sa area kan Enero 28, ngonian na taon kan pagkudalan kan 50 kalalakihan na de maskara an pig-oorolayang kadagaan.

Alagad pigpapundo kan municipio an pagkudal sa binino kan stoppage order na pigpaluwas ni Engr. Salvador Madrid, municipal building officer. Paulo DS. Papa