ISYU SA PAGBALYO KAN REG’L OFFICE SA ALBAY: Konsultasyon muna antes kan desisyon ihubo an BFAR offic
Maninigo na paagihon sa konsultasyon sa sektor nin parasira maging mga lokal na gobierno asin iba pang sektor an planong pagbalyo kan opisina rehiyonal kan Bureau of Fisheries an Aquatic Resources (BFAR) antes kan ano man na desisyon na ihubo ini sa Ciudad nin Ligao, sa provincia nin Albay.
Si Fernando Hicap, pamayo kan Pambansang Samahan ng Malakaya sa Pilipinas (PAMALAYA) nagpahayag sa Bicol Mail nganing mayong angal sa apektadong sektor kinakaipuhan magkaigwa muna nin konsultasyon.
Alagad kun hehelingon bilang regional center an Albay nababagay sa Ciudad nin Ligao na ibalyo na an BFAR regional office sa Ciudad nin Ligao hale sa Camarines Sur, sabi pa ni Hicap.
Si Hicap na tubong Sorsogon nagsabi kun an pamayo kan BFAR taga Sorsogon puedeng itulod na darahon sa saindang provincia alagad an direktor rehiyonal kaini na si Nelson Bein taga Albay an ambisyon darahon man sa saiyang provincia.
An presenting opisina rehiyonal sa Bula, Camarines Sur kumpleto na nin facilidades asin namugtak sa maabot sa tres hektarya nin lote kumpara sa Ligao na nagdonar sana an LGU nin dos mil metros cuadrado.
Kan panahon ni dating BFAR director Dennis del Socorro na taga Camarines Sur.
Nabigla an sektor nin parasira sa Camarines Sur huli kan dai lamang sinda pig-inpormaran kan pamayo kan BFAR mala ngani na-araman sana ninda sa Bicol Mail na nagpirmahan sa babalyohan na lote si Bien asin Alcalde Alsua.
Kasurog na ninda sa pagcontra sa plano kan BFAR iyo an lokal na gobierno kan Calabanga, Camarines Sur.
An lider kan Pederasyon ng mga Maliliit na Manginisda ng San Miguel (PEMMA-SMB), Inc. Charlie Capricho saindang pig-cocontra an sadiring desisyon kan direktor rehiyonal kan ahencia huli ta mas dakul sinda sa Camarines Sur asin kabale sa apektado iyo an mga parasira sa San Miguel Bay, Ragay Gulf, Lagonoy Gulf asin Lake Buhi maging an provincia nin Camarines Norte.
Si 3rd District Congressman Fernando Cabredo kan Albay suportado na an pagbalyo kan BFAR regional office hali sa Bula, Camarines Sur nin huli ta ibabalyo sa saiyang distrito.
Afuera pa kaini, igwa nang inisyal na Php10 milyon na alokasyon para sa konstruksyon kan bagong BFAR regional office. (dpa)