Ka-Fuerte vs Anduyog
An durulak ni Presidente Duterte asin Senador Manny Pacquiao politika sana, panu-pano nin drama asin pagsaguin-saguin.
Apuera ki Duterte si Pacquiao iyo na an pinaka-popular sa mga nakatukaw sa pwesto na politiko ngonyan.
Makuarta pati asin pigtutubud kan mga Pilipino bako lang kan mga DDS kundi mga Yellowtards. Kaya bakong imposible na mag-aspirar an pambansang kamao para presidente kan Pilipinas.
Sa isyung korapsyon na pigdadaklag niya sa gobyerno ni Duterte aram man kan gabos na an korapsyon digdi sa Pilipinas bako lang ngonyan bako lang kan panahon ni Marcos asin kan mga Aquino kundi poon pa kan tiempo Espanyol pati kan mga Frayleng Kastila sagkod na mag-abot an mga Amerikano na iyo an nagtukdo sa Pilipino kan terminong korapsyon o pagkurakot kan fundo kan gobyerno.
Sa milyones na mga Pilipino na nag-aasa sa gobyerno bako lang trabaho kundi pati ayuda sa pang-aro-aldaw na pangangaipo, pano mo mahahali an korapsyon sa magastos na eleksyon asin daing kabasugan na elektorado.
Sa tahaw kan pandemya, pig-aakusaran ni Pacquiao an Department of Health sa pangengenot ni Sekretaryo Francisco Doque III sa dai maipaliwanag na bilyones na gastos kan gobyerno kontra Covid kabali na an ginamit sa pagbakal nin PPEs, mga equipajes asin mga gamit sa ospital arog kan mga mamahalon na bulong na may relasyon sa kampanya kan gobyerno kontra sa corona virus desease.
An pag-question ni Pacquiao sa administrasyon ni Duterte panahon na gayo kan bespiras kan eleksyon norong taon na pahalion na an nakatukaw na presidente asin sasanglian na nin bagong hepe ehecutivo.
Nakamalisya man an Presidente kan tono kan boses ni Pacquiao na parareho kan tono kan Liberal Party asin iba pang lider kan oposisyon.
Segun ki Duterte maski matapos na an saiyang turno pero bako pa siyang lame duck president kaya dai pa siya pwedeng pagbasang-basangon.
Kun si Pacquiao magkandidatong Presidente siya taga-Mindanao, si Mayora Sara Duterte-Carpio taga-Mindanao, si dating mahistrado Antonio Carpio taga-Mindanao man.
An kaibahan sa ISambayan ni Justice Carpio, si dating Ombudsman Conchita Carpio Morales taga-Mindanao pa man.
Pano na palan an taga-Luzon? Yaon siyempre si VP Leni taga-Bikol, si dating senador Antonio Trillanes na taga-Bikol man daa, si senador Ping Lacson kan Cavite asin si Senate President Tito Sotto kan Metro Manila asin Cebu, si Bongbong Marcos kan Ilokandia anas man sinda aspirantes kun bakong number one, number 2ng pwesto sa gobyerno.
Kun ma Bise si Presidente Duterte asin maguin aktibo pa sa masunod na karampanyahan di bako siyang lame duck pwede niyang mapagana an saiyang aki para Presidente na siya an Bise garo man lang pag-pagana niya ki Sara bilang Mayor sa Davao City na siya an Bise.
Labing 90 porsiento pa an trust rating kan Presidente sa latest Pulse Asia Survey na garo daing paki-aram an mayoriya kan mga Pilipino sa isyu kan West Philippine Sea.
Piggagana pa kan gobyerno bako lang an giyera kontra sa droga kundi pati giyera laban sa NPA, mga rebelde asin iba pang terorista.
An oposisyon maguin an Liberal Party, an ISambayan asin iba pang nagkokoro-kontra sa gobyerno nawawara sa diskusyon asin walat sa baybayon sagkod sa mga oras na ini kun pano papaganahon an kalaban kan presenteng administrasyon.
Libog sapa pa an kamugtakan kan politika sa Pilipinas, kontrolado pa kan gobyerno an mga isyus kaya lugod ribong an balanak kan mga namamanwaan.
Sa siring na sitwasyon drama o bako an simbagan ni Duterte saka ni Pacquaio, si Duterte man giraray an nagdidikta kan hiro sa politika sa Pilipinas pati kan responde kan oposisyon asin iba pang may aspirasyon.
Digdi sa ibaba an mga politiko maguin gobernador, congressmen, mga mayors nagbabayle man lang sa kumpas kan Malacanang lalo na ngonyan na panahon nin pandemya asin quarintina.
Kun uugkoron ngonyan an magkaralaban na kampo digdi sa Camarines Sur, an Anduyog ni Andaya, Arroyo, Fuentebella asin Alfelor kontra sa Ka-fuerte kan mga Villafuerte anas man nagpapa-pogi ki Duterte.