Kartel, Sinehan Kan Mga Aki

An mga Bikolano na guminurang duman sa America asin nagbalikbayan sa Bikol, an saro sa saindang pinag hahanap iyo an mga sinehan kan Bichara. An ibang hinahanap iyo an mga gurangan na restawran sa Naga asin idtong tarabugaan sa Plaza Rizal lalo na si Kalamay. Minsan sarong amay na pagka aga, naglaog ako sa Dunkin Donuts sa kanto kan Calle Abella asin Gen. Luna duman ko nasumpungan si Tyo Jun Bichara asin an saiyang mga miembros kan familia ta naging ugali ni Tyo Jun an magpamahaw sa Centro kaiba an familya asin mga amigo ta mas masiram magpamahaw sa centro kan Naga ta igua nin mga kaistoryhan, bakong boring an buhay. Palibhasa perang pedaso sana man an lamesa asin tukawan sa Dunkin, kaya dai ako nagka igua nin Esperanza na maki-taid asin maki istortya ki Tyo Jun Bichara. Kutana makaulay ko si Jun Bichara para hapoton kun dai pa raot, dai pa taranggal, dai pa tinatakla idtong mga projector asin mga gamit sa sinehan ta siguradong gulping bikolano an magkaka interes na mahiling an mga nag iiritok na gamit sa laog kan Projector’s Room kan mga sinehan ni Bichara. An projector iyo idtong pig may lente na nakatutok sa halabaon na negative film kan pelikula tanganing mahiling sa telon an pag hiro asin pagtaram kan mga actor. Nagkakaperang beses na pig tukar sa samuyang tiripon sa Sumaro Bikolnon sa pamamayo ni Mr. Ramon Olano na makukua sa Fishcove, Abella, Ciudad nin Naga an mag suhestion sa familya kan Bichara na sinda mag tugdas nin sarong klase nin Museo na an laog iyo an gabos na makina sa pagpaitok kan sine asin saro digdi iyo an Projector. Magayonon siguro na magka igua nin Film Museum sa Naga City ta sigurado ining bibisitahon nin mga dating para sine sa mga Bichara Theatres ta kabale sa naka display iyo an mga kartel na pig dudukot sa may takilyera. Kaidto, kaming mga pobreng aki, dara kan pagtios, nakukuntento na mag ralakaw lakaw sa centro asin maghiling nin mga kartel sa mga sinehan Arog kan Bichara, Emily, Alex, Vic, Jade, Albe, Premier, Metro, Victory, Poon and Jason asin El Rey. Sa paghiling nin kartel puede na kaming mag istorya sa mga kaklase sa escuelahan. Kami kaya kaidto, nakaka isip na mag habin sa uma, mag sa-shine nin sapatos asin nagtitinda nin dyaryo tangani sanang makalaog sa sinehan, garong arog kan istorya sa buhay ni Boxing Legend Roberto Duran kan Nacion nin Panama, na kan siya daa aki pa, nag sa-shine siya nin sapatos tangani sana iguang pang sine. An mga familya kaidto iribahan sa pagsine, kun si Ama nagka iguang delihensya sa negocio o bagaman iguang naresibeng bonus. An sinehan iyo an pinaka halangkaw na forma nin entertainment ta mayo pa kaidto nin computer, cellphone asin internet. Kadakol magayon na istorya sa laog kan sinehan, yaon diyan an irelosyonan, asin premirong hadok asin akbay sa elosyon, masiram magkakan nin mani sa laog kan sinehan, minsan pig istotorya pa ni Joey de Leon sa Eat Bulaga, na sa laog daa kan sinehan sa Manila, nadiskubre an pagbalon nin sarong supot nin lanzones para ipadukot sa girlfriend ta managom magkakan nin lanzones lalo na kun mahamis. Kaya bitbit kan mga bikolano an kadakol na istorya sa sinehan ta dakula an pig ambag kan mga sinehan ni Bichara sa kulturang bikolnon. Kun magkaka igua man nanggad nin Cinema Museum sa Naga, saro ining magayon na lugar na dapat pasyaran lalo na kan mga kagugurangan na kaidtong panahon mga aki pa sinda asin nagsasakripisyo na mag ani sa uma, magtinda nin kangkong, mag shine nin sapatos, asin mag tienda nin dyaryo tangani sanang maka laog sa sinehan ni Bichara. Sa sinehan inot kong nahiling an Manila, sa sinehan inot kung nahiling ang Luneta asin sa sinehan sana nahihiling ko an America kaya an sinehan tunay na parte nin buhay nin maogmang bikolano.