KINUNDENAR KAN GABRIELA: Daraga na magradwar sakolehiyo nakuang gadan na

Bako lang sarong buhay an sinayang alagad maging an familia apektadong marhay sa makangirat na krimen na inabuso na, ginadan pa an sarong 22 anyos na daraga na magradwar sa kolehiyo na nakuang gadan sa Brgy. Hindi, Bagacay, Albay.


Kinukondenar kan Gabriela Bicol an makangirat na krimen na mayong kalaban-laban na inabuso asin dagos nang ginadan an biktimang binisto si Rhea Bejerano Boneo na nakuang nagkakarigos sa sadiring dugo kan Martes na aga, Hunyo 7.


Si Nica Ombao, regional coordinator kan Gabriela Bicol nagpahayag na garong sa hayop an ginibo sa biktima alagad namumundo sinda ta igwa pa giraray nagbabasol na kasalan kan biktima.


Dapat pundohon an arog kaining pang-uugali magtabang na sana bakong magbasol, sabi pa ni Ombao.


Si Police Major Irvin Bellen, jefe de Bacacay Municipal Police Station nagsabi sa inisyal na inbestigasyon naheling sa sarong tagong lugar sa saindang barangay na mayo nang buhay an biktima.


Piglaslas an liog, may tama pa nin saksak asin parakit na an pantalon na nagkakarigos sa sadiring dugo kan maabotan kan awtoridad kan Martes na aga.


Sinabi pa kan MPS Daraga, an biktima nagpaaram sa magurang hapon kan Lunes nganing mag-withdraw kan Php500.00 na cuartang pinadara kan saiyang tugang hale sa Sorsogon.


Kan dai na makapuli nagtarabang an familia nganing hanapon.


Igwa nang ‘‘person of interest’’ an Daraga MPS na iyo an pigtutubodan na responsable sa krimen.


Pig-aandaman na kuta niya an pag-gradwar sa kolehiyo sa sarong pribadong escuelahan sa Ciudad nin Legazpi sa kursong Bachelor of Science in Accountancy.